ORANJESTAD – DAO ta introduci un metodo nobo cu ta dinamico, flexibel y transparente pa colecta y publica e Manpower Planning (necesidad di personal) a corto y a largo plaso riba e mercado laboral y ta pidi bo cooperacion den esaki.
E Manpower Planning tin su base legal den e Ordenansa Laboral 2013 (Arbeidsverordening 2013, AB 2013 no.14) cual ta vigente desde 1 di april 2013. Un dunado di trabou tin e obligacion, basa riba articulo 30 punto 1 di e Ordenansa, pa manda un Registro di Personal riba peticion di e Director di e Departamento di Labor & Investigacion (Directie Arbeid & Onderzoek, DAO). E Registro di Personal ta consisti di tres parti, esta Modelo 1A den cual ta indica e personal cu tabata den servicio e aña anterior ; Modelo 1B den cual ta indica e necesidad di personal pa e aña venidero den un empresa; y Modelo 1C den cual ta indica e necesidad di personal en conexion cu un proyecto specifico pa e aña venidero.
Metodo nobo
Desde aña pasa a introduci un metodo nobo pa entrega di e documentonan aki na DAO. E metodo nobo ta encera cu e compania, via un portal cu su mesun datonan di login, ta haya acceso na e database LABORA di DAO pa yena/entrega e datonan di e Registro di Personal y e Manpower Planning. Asina e compania por mira su datonan laboral na cualkier momento.
Si bo ta desea di participa na e metodo nobo aki, por manda un email pa sr. Simon Brete ([email protected]).
Fecha di Entrega di Manpower Planning 2025
DAO ta haci un peticion pa medio di e comunicado di prensa aki pa entrega e Manpower Planning pa 2025 di bo compania y/o e necesidad di personal en conexion cu un proyecto specifico pa 2025. E entrega di e Manpower Planning ta cuminsa dia 4 di december 2024. Tene cuenta cu esaki!
Publicacion di Manpower Planning riba website di DAO
Lo analisa e Manpower Planning colecta di companianan te cu 31 di januari 2025 y lo publica esaki di forma anonimo y na e nivel macro den e prome siman di februari 2025. E analisis ta concentra riba e tendencianan y conocemento necesario pa cu e sectornan y funcionnan di e necesidad di personal indica. Lo bay publica e resultadonan di e analisis aki riba e website di DAO (www.daoaruba.com) y ta contribui na un mihor comprondemento di e dinamica di e personal riba e mercado laboral y ta sostene e planificacion strategico como tambe desaroyo di maneho.
Ta bay publica e resultado di e Manpower Planning indica te cu 30 di juni 2025 den e di tres siman di juli 2025 riba e website di DAO (www.daoaruba.com).
Por entrega e Manpower Planning na DAO solamente den forma digital (via e database di LABORA of por medio di un Excel sheet na e email [email protected]).
Si tin necesidadnan nobo, of cambionan of adicionnan riba e Manpower Planning (e necesidad di personal) indica di bo compania durante e aña 2025, bo por comunica esaki na DAO na cualkier momento durante e aña.
Pa e dunadonan di trabou cu ainda no tin acceso na e portal di LABORA, nan mester manda nan Manpower Planning mediante un Excel sheet. Desde 2 di december 2025, lo por download e Excel sheet for di e website www.daoaruba.com of www.gobierno.aw (Excel sheet:DAO Personeelsbehoefte 2025) of bo por pidi esaki via email na [email protected], y DAO lo mand’é pa bo via email.
Si e compania ta manda e Manpower Planning via e Excel sheet (segun Modelo 1B y/of Modelo 1C), ta pidi pa yena tur e datonan den e version digital di e formularionan y mand’e pa e email [email protected].
Den caso cu bo compania tin un of mas sucursal, DAO ta haci un peticion pa yena e Registro di Personal no solamente pa e oficina principal (hoofdvestiging) (p.e. KvK-nummer 5555.0) pero tambe pa cada sucursal (p.e. KvK-nummer 5555.1, 5555.2 etc.).
DAO ta recorda cu ta obligatorio pa manda e Manpower Planning entrante 4 di december 2024 (si tin un necesidad di personal den bo compania).
Fecha di entrega di Registro di Personal 2024
E entrega di e Registro di Personal 2024 (Personeelsregister) 2024 cu e datonan di e personal den aña 2024 (Modelo 1A) ta tuma lugar na un momento mas despues, esta den e periodo di 1 di februari 2025 te cu 15 di maart 2025.
Pa companianan cu ta haci uzo di un intermediario (p.e. accountings- of adviesbureau) DAO kier recorda cu cumplimento di nos leynan laboral ta un obligacion di e dunado di trabou y no di e intermediario.
Si tin pregunta, por tuma contacto cu sr.Simon Brete na number di telefon 5237718 of via email [email protected] of cu sra.Louisetty Croes na number di telefon 5237722 of via email [email protected].
