ARUBA – Aruba Fashion Week 2024 a consolida manera un evento clave den e region, destacando no djis e creatividad y e talento local, pero tambe generando un impacto economico significativo dor di trece bishitante di mercado turistico emergente manera New York, New Jersey, Florida, Colombia, Argentina, Brasil, Chile, Mexico, Republica Dominicana y Hulanda, entre otro.
E evento a demostra di ta un motor pa multiple sector di e economia local. Entrada genera door di e bishitantenan aki ta refleha den pasashi, estadia di hotel, transport y huur di auto, mescos cu den gasto na restaurant y otro servicio. Ademas, Aruba Fashion Week a amplia e cobertura den media di e isla, proyectando tanto Aruba mescos cu su diseñadornan local den e luz internacional. Esaki ta fortalece e economia creativo, un sector clave den e diversificacion economico di Aruba.
Economia local tambe a beneficia directamente di e participacion di modelo, makiyado, stilista, ekipo di produccion, artista y otro servicio. E sinergia aki a fomenta e talento local y genera trabou tanto temporal como fiho, contribuyendo na e crecemento economico di e isla.
Un di e logronan mas grandi di e evento tabata di reuni personalidad di e industria di moda, influencers, agencia publico manera ProColombia y media internacional reconoci manera Vogue Magazine, New York Fashion Week, Fashion Week Online, E Now Latino y Red Caracol. Esaki no a djis aumenta e visibilidad di Aruba como destino di moda, pero tambe a posiciona e evento manera un referencia regional pa Caribe y America.
Ademas, Aruba Fashion Week 2024 a sirbi como un plataforma di comercialisacion pa marcanan local y internacional, habriendo porta tanto den mercado domestico como global. E evento ta reafirma cu Aruba por competi na e nivel di e capitalnan principal di moda manera New York, Paris, Londres, Milan y Colombia, birando un punto di encuentro strategico pa diseñador, empresario y creativo di henter mundo.
Aruba Fashion Week ta celebra e talento y creatividad mientras ta destaca manera un catalisado di e progreso economico y cultural. Su exito ta consolida e reputacion di e isla como un destino di luho y tendencia, marcando tereno den e panorama di moda regional y internacional.
Celebrando su di 5 aniversario, Aruba Fashion Week ta proyecta den e proximo añanan manera e evento di moda lider den Caribe, capaz di atrae tanto invitado di profiel halto, mescos cu un balor mediatico grandi pa fortalece nos destino y experiencia.
Aruba Fashion Week 2024 tabata posibel danki na e apoyo di: Aruba Tourism Authority, Departamento di Cultura Aruba, The Ritz Carlton Aruba, Marriott Resort Aruba & Stellaris Casino, Courtyard by Marriott Aruba Resort, Kok Optica, Swift Trading, Celine, Givency, Dior, Loewe, Tom Ford, Kerastasse, Revlon, Elite Productions, Bohemian, UNOCA, Cava Wine & Spirits, Cmart, Gold Coast, House of Mosaic, Sun Bum Beach, Caribbean Print Center, Digital View, 360 Viewer, Bodegas Papiamento, Romano Travel & Logistics, Verbum Works, Smart Rent, OML Fashion, Bodyzone, ID Realty Group, Sky High Dominicana y Avianca.
