Oranjestad-Aruba
Dialuna mas o menos 11:30 di mainta Central di Polis a wordo notifica di un accidente serio cu a tuma lugar na Santa Cruz na altura di e brug di canashito. Polis y Ambulance ta yega na e sitio cu maximo urgencia. Na e sitio polis a haya dos vehiculo envolví. Ta trata di un Hyundai, Getz color cora cu di un of otro manera a bay den su direccion contrario y a dal frontal den un auto GMC color blanco.
Ambulance a haci nan maximo esfuerso pa ayuda e vicitma di e Hyundai pero mucha mas no por a haci. Dr.Voskuil a presenta na e sitio y a constata e di 13 morto den trafico cu ta trata aki di e señora Sandra V.F.F. GROWELL naci na Aruba dia 4 december 1962 di 62 aña di edad.
Polis forensico, Slachtofferhulp como tambe Specialista di trafico, hefe di trafico y altocomisario di Polis tabata presente na e sitio. E investigacion ta den man di Departamento di trafico.
Cuerpo Policial Aruba ta manda un palabra di condolencia na e famia di fayecido y hopi forsa.
Un mensahe na tur nos automobilistanan ta pa sigui reglanan y ley di trafico. No maneha bou influencia como tambe No celular na man!
