103
Proximamente e conocido autor multifacetico Quito Nicolaas lo ta na Aruba atrobe, pa celebra e dianan di Pasco na cas. Ainda e tin e grato recuerdonan como hoben di e temporada di Pasco y Aña Nobo na Aruba. E temporada unda tabata tin gruponan di gaita ta toca dilanti di e pacusnan manera, Aquarius y Spritzer & Fuhrman, cu awendia no tei mas. Tambe e multitud di hende cu ta Sali anochi of ta core rond den auto pa wak e pacusnan dorna cu luznan di Pasco. Tur esaki pa difruta di e ambiente di Pasco.
Recientemente e autor a traha un grabacion di video, unda e ta conta di su bida y ta papia di e cambionan climatologico, pa e publico di Bolivia.Tambe a sali den e buki ‘Caribbean convivialities and Caribbean Sciences’ un ensayo di di su personan, titula: The promotion, demotion and exclusion of Aruban and other Dutch Caribbean migrant literature. Un observacion di su banda cu aki na Aruba mester haci algo cu ne, den forma di un programa na radio y tv, unda ta invita autornan local pa papia encuanto di nan buki.
Durante su estadia e lo tin dos presentacionpa publico, di cual e prome lo ta den e programa Nos Mainta di Siomara Everon na Tele Aruba. Y e siguiente dia, e lo ta formando parti di un panel, consistiendo di Desiree Corea, Olga Buckley, Jossy Tromp y su persona pa papia tocante Literatura na Aruba. Con pa stimula esaki y duna un empuhe na nos Literatura. E actividad aki lo tuma lugar na Biblioteca Nacional di Aruba den George Madurostraat.
Na aña 2022 su persona a keda sorpresa, na momento cu pa su publicacionnan internacional el a ser condecora como Officier den e Orden di Oranje Nassau. Tumando e trayectoria ñargo cu un nombramento asina ta pasa aden, prome cu Rey Willem Alexander pone su firma riba e decreto, ta algo hopi serio y solemne. Pa sr. Nicolaas ta importante pa e sigui apoya nos Papiamento y di sigui stimula nos Literatura Arubiano, apesar cu ainda e no ta forma parti di nos curiculo di enseñanza.
Despues di regresa Hulanda bek, e’lo cuinsa traha na su ultimo bukinan pa publica esakinan. Te aworaki e’la publica 13 buki, di cual Sombra di recuerdo ta e prome novela di 400 pagina na Papiamento. Sinembargo ainda falta e.o. su ensayonan y tambe su propio bida cu e ta desea di saca den forma di buki. No cabe duda cu despues di su estadia na Aruba, lo na ta e ultimo biaha cu ta tende di su persona. Aunke residencia den exterior, e lo sigui traha pa saca cara di Aruba riba plataforma internacional.