ORANJESTAD – Dialuna mainta a tuma luga na e Sewage Treatment Plant (STP) na Parkietenbos e reanudacion di e operacion y servicio. Durante un conferencia di prensa e mainta aki, a hiba palabra director di Utilities Aruba NV señor Anthony Rojer, señor Armando Marchena STP Supervisor, señora Melanie Lopez cu ta Engineering Manager y señor Kirby Barerra cu ta e Techinical Advisor.
Señor Marchena a splica cu na Maart 2024 e liña di aire a rementa. E tankinan tabata den hopi mal estado cu a causa cu AWSS mester a baha ful e planta, y mirando cu no por a haya e materialnan aki na Aruba, a dura basta tempo pa por a drecha e planta. Unabes cu a ricibi e materialnan e team dinamico di e contratista, operator y maintenance, a traha duro pa asina por a logra yega hopi leu cu e trabou pa pone e planta bek den funcion.
Na su turno señor Marchena a indica cu nan ta sumamente orguyoso di e proyecto aki, mirando cu e ta e prome proyecto pa loke ta e “upgrading” di e plantanan cu mester di mantencion. Na comienso di 2025, e planta na Zeewijk lo wordo baha pa asina e por haya su debido “upgrading” y mantencion. Pa loke ta Bubali, tin un proyecto interino andando na unda lo bay cambia diferente ekipo pa asina tin un operacion optimal. Alabes tin trabounan andando pa dentro di 2 pa 3 aña por conta cu un planta completamente nobo pa por yega na e capacidad cu mester pa e area aki.
Señor Barerra a indica cu un di e retonan mas grandi ta pa trece innovacion, modernisacion y digitalisacion den AWSS. Si logra esaki, AWSS lo por premira e “downtime” mas lihe of elimin’e completamente pa asina e no ta un molester mas pa pueblo ni pa nos bishitantenan. E lo dura poco pero trabounan pa cu esaki ta andando. El a indica cu e team ta grandi y ta pushando tur cu tin pa logra termina esaki den termino corto. Parkietenbos lo ta completamnete optimal pa december y lo cuminsa e proceso di digitalisacion. AWSS tambe ta trahando riba e rioleering pa asina elimina tur e posibilidad di awa sushi riba caya.
Por ultimo a hiba palabra director di Utilities Aruba señor Rojer cu a cuminsa na expresa su
gratitud na tur e ekiponan cu a haci esaki posibel, mirando cu awor cu e facilidadnan ta operando, e trucknan lo no mester bay te Zeewijk pa hiba awa.
Tambe Señor Rojer a splica cu Aruba Wastewater Sustainable Solution (AWSS) no solamente lo renoba e componente nan di e planta pa continuidad den operacion, pero alaves lo inverti den e infrastructura y expansion di cada planta pa sigura sostenibilidad di operacion.
Den e prome añanan, AWSS su meta ta pa enfoca riba hisa calidad di e awa efluente, y mitiga e efecto riba medio ambiente. Lo renoba e lineanan di rioleering existente, lo trece regulacion, y lo tin mas control pa un miho operacion. Tambe tin plannan pa haci e awa trata na nivel, cu ta cumpli cu norma nan pa agricultura y irigacion. E awa efluente aki lo ta disponibel na prijsnan atractivo, pa agricultura y pa irigacion en general.
Director di Utilities Aruba a indica cu esaki ta e prome planta cu a wordo treci bek den operacion, y cu awor lo sigui cu mantencion grandi y upgrade di e siguiente plantanan. Mirando cu e demanda pa hiba awa ta sigui crece, AWSS lo traha pa tin un operacion “future proof” paso ta di e manera aki so lo por cumpli cu tur e demanda.
“Mi ta gradici tur e ekiponan cu a traha incansabel pa logra trece e facilidadnan aki bek den operacion. Cu e planta operando, e trabou di e trucknan pa hiba awa lo ta uno mas facil. E trecemento di awa ta completamente gratis, pues no tin ningun motibo pa e trucknan benta awa den luganan cu no ta permiti” Señor Rojer a expresa.
