MACUARIMA, ARUBA: Altocomisario di Polis drs. Ramon Arnhem su meta y vision ta cu e personal y agente policial ta central y nan empeño y esfuerso ta wordo aprecia y balora.
Cada personal ta traha duro y ta bay e extra esfuerso pa mantene e seguridad Nacional di Pais Aruba halto. Esaki nifica tambe un peso hunto cu n’e. Mando policial ta na altura tambe cu e polis no ta haya tempo pa por relaha un rato despues di un asistencia pisa, e polis mester sigui haci su trabou.
Ta den e cuadro aki altocomisario a bishita diferente departamento di polis como tambe wardanan di Polis pa trece su mensahe dilanti cu ta hiba lo siguiente palabranan “Nos presencia akinan ta temporario p’esey laga nos haci e momentonan aki balioso y recorda bunita recuerdonan hunto”. E palabranan aki a wordo pon’i riba un holoshi pa asina cada colega por recorda riba e tempo cu ta pasando bay y e no ta warda.
Hunto cu n’e tambe a haci entrega di dartboard como tambe football table na e departamentonan. E motibo tras di esaki na momento cu e agente ta bou di stress e por haya un momento cu e por relaha un rato pa despues e por sigui focus bek pa su tarea. E agente por haya e momento pa e por relaha pasobra e tambe ta hende cu sentimientonan.
E agentenan Policial a keda impresiona cu e bishita pero mas aun ta agradecido cu e palabranan importante cu a keda scirbi riba e holoshi cu a haci un efecto personal na cada un di nan. Tambe nan e probecha e momento pa nan sinta papia cu Arnhem kende na su turno a scuchanan pa sigui traha riba nan preocupacionnan.
Polis por ta superheroe pa hopi pero en realidad e tambe ta ser humano. Pesey Cuerpo Policial Aruba lo sigui enfoca riba e bienestar di cada polis cu ta haciendo nan maximo esfuerso asta bou temponan difícil of temporadanan druk. Altocomisario ta orguyoso di cada Polis cu ta haciendo asina hopi di nan mes pa mantene orden publico pa Pais Aruba. Nos di mando policial ta wak bosonan esfuerso y NO ta laga esaki bay asina sin mas!
