“Mi tin un admiracion y respet grandi pa e esnan cu a bin dilanti y conta nan storia y mi ta felicita nan pa nan curashi”
ORANJESTAD – Recientemente Gobierno di Aruba a ilumina Bestuurskantoor cu luznan oranje, dunando sosten na e 16 Dianan di Activismo Contra Violencia di Hende Muhe y Mucha Muhe y asina ta uni na e campaña mundial “Orange the World. E 16 Dianan di Activismo Contra Violencia di Hende Muhe y Mucha Muhe ta un campaña internacional cu a cuminsa 25 di November, Dia Internacional pa Eliminacion di Violencia Contra Hende Muhe, y ta dura te 10 di December cu ta Dia di Derechonan Humano.
En conexion cu e 16 Dianan di Activismo Contra Violencia di Hende Muhe y Mucha Muhe, Prome Minister Evelyn Wever-Croes a atende un evento organisa pa CEDEHM (Centro di Desaroyo di Hende Muhe), unda 4 victima di violencia a comparti nan storia di victoria. E palabra ‘victoria’ ta pa motibo cu e 4 storianan menciona tin un final feliz.
Prome Minister a expresa cu e storianan a toca su curason y a caus’e dolor pa scucha cu mucha muhenan y hende muhenan ta pasa den abusonan asina. Na e mesun momento tambe el a expresa su admiracion pa e 4 damanan aki, pa nan fortalesa y curashi pa comparti nan storia cu esnan presente.
Scuchando e 4 storianan ta fortalece mas ainda e compromiso di e lider maximo di pais Aruba pa sigui bringa contra e crimen aki. Tur hende muhe y mucha muhe merece respet, felicidad y oportunidad. Tin demasiado muhenan na Aruba cu ta victima di violencia y esey ta inacceptabel y tin cu stop. E mandatario ta haci un peticion na esnan cu ta traha den e veld social y tambe familiarnan cu ora wak casonan di abuso y violencia contra un hende muhe y mucha muhe, denuncia, no por keda keto mas.
“Durante e 16 Dianan di Activismo Contra Violencia di Hende Muhe y Mucha, ami, den nomber di Gobierno di Aruba ta reafirma nos compromiso pa sigui combati e crimen aki y yuda e victimanan. Mi tin un admiracion y respet grandi pa esnan cu a bin dilanti y conta nan storia y mi ta felicita nan pa nan curashi. Mi ta gradici CEDEHM pa organisa e evento y nos lo sigui pone luz riba e problema aki y sigui busca un solucion p’e”, Prome Minister a indica.