ORANJESTAD, 2 december 2024: Den sala di Parlamento por a mira un falta di respet cu a keda demostra di parti di e miembronan di oposicion. Un di e actitudnan aki tabata esun di lider di MAS, Marisol Lopez-Tromp, kende a presenta cu un mata di moringa y pone esaki dilanti di Prome Minister, Evelyn Wever-Croes.
Esaki sigur tabata un show basta ridiculo di parti di e señora aki cu 27 aña di experiencia den politica, asina Parlamentario di Fraccion di MEP, Ricky Hoek a declara.
Banda di esaki a haya Sra. Gerlien Croes cu ta promove un politica moderno y cu a bisa cu e no ta acepta situacionnan asina’ki y a lanta bay y retira for di sala di Parlamento bisando cu e no kier ta parti di esey.
Miguel Mansur di Accion21 den un ‘talk show’, a bisa poco dia pasa aworaki e bloke di e partidonan chikito ta mas uni cu nunca, e mes a tira Sra. Gerlien Croes bao di mesa bisando cu esey ta e ‘ultimate show’.
Aruba no kier lidernan asina cu ta laga pueblo na caya, Hoek a remarca. “Ban ta critico, ban pensa, ban ta consciente si esaki ta e lidernan cu nos kier pa goberna nos pais den e proximo añanan nos dilanti”, e parlamentario a declara.
Falta algun dia pa eleccion di dia 6 di december y a keda demostra cual ta e partidonan cu bo no mester vota p’e.
Fraccion di MEP a mustra tur e profesionalismo y e sosten cu tin pa pueblo di Aruba. “Nos ta hopi contento cu Sra. Evelyn Wever-Croes por a defende su mes tambe y cu Minister Rocco Tjon di Husticia tabatey y cu a enfatisa cu el a bay Parlamento pa defende husticia na Aruba”, Hoek a expresa.
No por ta asina cu un parlamentario cu tin un condena riba su cabes ta sali como prome orador y ta bisa cu tin prueba contra di Prome Minister. E no a mustra ningun prueba, pero si kier a haci buya grandi y ta ofende Ministerio Publico y e cadena di husticia na Aruba. Esaki ta actonan hopi peligroso, a remarca, caminda cu e mesun politiconan parlamentarionan ta acusa institutonan independiente pa nan mesun casonan personal.
Pueblo di Aruba mester di un politica di calidad y di un nivel mas halto, a agrega.
Finalmente, Ricky Hoek a expresa cu nan a keda asombra ora cu lider di fraccion di RAIZ a bisa cu a baha Sr. Vrolijk pa motibo di kiebro di Constitucion y na ningun momento por a indica cual ta e articulonan den Constitucion cu Sr. Vrolijk a kibra.
Esaki no ta e momento pa bruha tera y pesey ta pidi pa tin trankilidad y stabilidad pa e pueblo di Aruba pasobra den poco menos di dos luna Aruba a pasa door di situacionnan hopi tumultuoso y a pone hende pensa y perde confiansa den politica, y esey ta peligroso.
“Bo no por perde confiansa den politica, pasobra si bo perde confiansa den politica, e pais aki por bira ingobernabel y nos no kier yega na un estado asina ey”, e parlamentario di fraccion di MEP a declara den entrevista cu Noticia Impacto.