Door cu Gabinete Wever-Croes a crea espacio financiero, a cuminsa duna bek na nos pensionadonan
ORANJESTAD– Mientras nos ta yegando mas cerca di fin di aña, ta importante pa nos para keto y refleha riba e progreso cu nos a haci y e pasonan cu nos ta sigui tuma pa un futuro mas briyante pa tur Arubiano. Den su discurso nacional di diahuebs anochi, Prome Minister Evelyn Wever-Croes a duna un resumen di algun logro clave cu tawata posibel danki na e espacio financiero cu Gabinete Wever-Croes a crea, enfatisando riba e prioridad di Gobierno pa nos pensionadonan y e compromiso di e gobierno di e asignatura aki pa esnan cu a construi nos pais.
Duna bek na pensionadonan
Cu e espacio financiero, a cuminsa duna bek na pensionadonan, door di e aumento di pensioen di biehes y e aumento di reparatie toeslag 4 biaha caba den e ultimo 7 añanan. Y Entrante 1 di januari 2025, e pensioen di biehes ta bolbe subi cu 2.4%. Pensionadonan lo cobra esaki fin di otro luna caba. Den total e pensioen cu nos grandinan ta ricibi a subi cu mas di 400 florin den e ultimo 7 añanan. Esaki lo sigui subi den e añanan nos dilanti, na forma responsabel.
“Gabinete Wever-Croes a traha duro pa crea un espacio financiero despues di tur reto di e ultimo añanan. Y awo ta e momento pa nos duna bek na esnan cu a contribui asina hopi na crecemento di Aruba. E aumento di pensioen ta solamente un ehempel di con nos ta inverti den futuro di nos ciudadanonan. Nos ta comprometi pa garantisa cu nos grandinan, cu a construi e pais aki, por goza di nan biehes cu dignidad y felicidad. Esaki ta apenas e comienso, y nos lo sigui duna na nos pensionadonan y inverti den futuro di Aruba, den un manera responsabel”, Prome Minister a expresa.