Den Haag – Ta renombra tanto señor Hans Hoogervorst como señora Julisa Frans pa un di dos termino cerca e Colegionan di supervision financiero. Riba 29 di november 2024, Conseho di Minister di Reino a aproba nan renombramento. Entrante prome di januari 2025, riba proposicion di Hulanda, a renombra Hans Hoogervorst como miembro di Colegio di supervision financiero Corsou y Sint Maarten (Cft), Cft Boneiro, Sint Eustatius y Saba (Cft BES) – e renombramento aki a tuma loga den Conseho di Minister – y Colegio di supervision financiero di Aruba (CAft) pa un termino di tres aña. Entrante e mesun fecha, ta renombra señora Julisa Frans pa e Colegio di supervision financiero Corsou y Sint Maarten (Cft), tambe pa un termino di tres aña. E renombramento di señora Frans ta riba proposicion di Sint Maarten. E renombramentonan lo tuma luga pa Decreto Real.
Despues di un carera largo den politica hulandes, di 2011 pa 2021 señor Hans Hoogervorst tawata Presidente di e International Accounting Standards Board na Londres. Di 2007 pa 2011 e tawata Presidente di Directiva di Autoridad Mercadonan Financiero. Prome cu esey, e tawata Ministro di Salubridad Publico, introduciendo entre otro un sistema nobo di seguro medico.
Julisa Frans ta consultant independiente y actualmente ta eherce varios actividad di consehero. Den e periodo di 2008 pa 2021, señora Frans a desempeña varios funcion financiero pa gobierno, incluyendo esun di asesor senior di maneho financiero. Ademas, e tawata responsabel pa varios aspecto financiero di e actividadnan di recuperacion despues di horcan Irma.