Gobierno a inverti 800mil florin den 8 ciclo di e proyecto y lo sigui haci esaki pa e añanan venidero
ORANJESTAD – Diahuebs 28 di november Prome Minister Evelyn Wever-Croes a bishita Trupial Kleuterschool na Santa Cruz pa conoce e proyecto y mira e premionan cu e scol a gana a traves di EduTech, cual ta 15 Chromebook/Laptop y 15 Tablet.
Prome Minister a indica cu el a keda sumamente impresiona cu e lokaal di tecnologia ‘Raton Sabi Tech’ cu danki na e proyecto di EduTech, awor ta bon ekipa cu ekiponan electronico moderno y tambe por mira con bon e muchanan ta wordo guia pa e maestronan. Principalmente loke ta destaca ta e facilidad cu e muchanan tin pa maneha e ekiponan electronico mustrando nan habilidad cu tecnologia den e area di innovacion. Esaki ta un indicacion claro di con hopi por haci pa nos muchanan desde un edad hopi jong ora tuma e caminda di tecnologia y inonvacion den enseñansa. Trupial Kleuterschool ta un scol piloto y pionero y e plan ta pa na un momento implementa un proyecto asina den tur scol.
EduTech ta un proyecto di Gobierno di Aruba hunto cu Futura den cual te awo a pone 800.000 florin disponibel pa proyectonan di innovacion na scolnan. E proyecto di EduTech ta duna oportunidad na tur scol pa bin cu nan mesun proyecto y tin e posibilidad di gana fondo pa ehecuta e proyecto. E meta di e proyecto aki ta pa transforma lesnan dunando oportunidad pa un sistema di enseñansa mas interactivo, atractivo y innovativo pa e studiantenan.
“Gobierno a inverti 800mil florin caba den e ultimo 2 añanan, cual ta 8 ciclo di e proyecto di EduTech, o sea 100mil florin pa cada kwartaal. Mirando con exitoso e proyecto aki ta, lo sigui haci esaki pa e añanan venidero. Asina, ora cu ciclo 9 habri, scolnan por sigui inscribi nan proyecto y nan tambe tin chens di gana fondo pa esaki.
Mi ta felicita Trupial Kleuterschool como ganador cu nan proyecto y ta gradici e cabesante Señora Lourents-Tromp y maestronan pa kere den e proyecto. Ta hopi importante pa crea e interes den nos muchanan pa cu lesnan di innovacion, ya cu esey ta esencial y un punto importante den enseñansa actual. Pabien y exito na Trupial Kleuterschool cu boso lokaal di tecnologia ‘Raton Sabi Tech’ ”, Prome Minister a expresa.