Como sosten na e campaña di conscientisacion di 16 Dianan di Activismo Contra Violencia di mucha muhe y hende muhe
ORANJESTAD – Dialuna 25 di november, a inicia e campaña mundial di Conscientisacion 16 Dianan di Activismo Contra Violencia di mucha muhe y hende muhe. Comision Contra Violencia Domestico a bin hunto na Bestuurskantoor pa un ceremonia cortico y hunto cu Gobierno di Aruba a ilumina Bestuurskantoor cu luz oranje. Prome Minister Evelyn Wever-Croes durante e ceremonia a entrega un discurso cortico principalmente pa gradici tur esnan cu ta traha den fundacionnan, comisionnan y departamentonan cu ta haciendo tur posibel pa caba cu violencia di mucha muhe y hende muhe. Presidente di e comision, señora Magaly Maduro tambe a duna un discurso cortico durante e ceremonia.
Prome Minister a enfatisa cu Gobierno di Aruba ta duna sosten na e 16 Dianan di Activismo Contra Violencia di mucha muhe y hende muhe y ta uni na e campaña mundial “Orange the World. Pa Gobierno, esaki ta un simbolo pa recorda nos, no solamente di e retonan cu nos ta enfrenta pero e compromiso cu nos ta comparti como un gobierno y como un sociedad pa mantene e derecho y dignidad di tur individuo, specialmente nos muchanan y esnan mas vulnerabel den nos comunidad.
E 16 Dianan di Activismo Contra Violencia di mucha muhe y hende muhe ta un campaña internacional cu ta cuminsa riba 25 di November, Dia Internacional pa Eliminacion di Violencia Contra Hende Muhe, y ta dura te 10 di December, Dia di Derechonan Humano. E iniciativa aki ta activa conscientisacion mundial pa mobilisa individuonan y comunidadnan pa tuma accion y ta sirbi como un recordatorio poderoso di e necesidad urgente pa caba cu violencia den tur forma, promove igualdad y sostene esnan cu a sobrevivi violencia.
E tema di e aña aki ta encurasha nos pa reflexiona riba nos responsabilidad pa caba cu violencia den tur su formanan. Como un sociedad uni, awe nos ta para hunto, no solamente den solidaridad, pero den accion, mientras nos ta asumi nos compromiso pa fomenta un ambiente sigur y feliz pa tur. Esaki ta un oportunidad pa conscientisa, defende cambio, y specialmente pa scucha bosnan di esnan cu ta sufri den silencio.
Hunto, nos lo sigui fortalece nos leynan, amplia programanan pa informa nos pueblo, y percura cu recursonan ta disponibel pa sostene victimanan di violencia. Hunto nos. ta crea un sociedad unda tur ciudadano ta sinti nan mes sigur, respeta y empodera pa hiba un bida liber di miedo y daño.
“Durante e 16 dianan aki di activismo contra violencia di mucha muhe y hende muhe, mi ta encurasha cada un di boso, cada ciudadano, cada lider di nos pais, pa ta envolivi y participa den iniciativanan, programanan y conbersacionnan cu diferente fundacion y gruponan den nos comunidad ta organisa. Busca mas informacion riba e tema di violencia di mucha muhe y hende muhe y para firme contra violencia den tur su formanan. E esfuersonan di nos tur por incentiva cambio y inspira otronan pa uni den e lucha contra e violencia aki. Laga nos tur hunto haci un compromiso pa caba cu e crimen aki.
Danki pa boso presencia awe. Danki pa boso dedicacion na e causa aki. Laga cada luz oranje durante e 16 dianan aki, recorda nos cu tin speransa pa un futuro pa cua nos ta lucha, un futuro unda cu tur hende, specialmente nos muchanan, por prospera den siguridad, dignidad y Felicidad”, Prome Minister Evelyn Wever-Croes a expresa.
Uni cu Gobierno di Aruba, Comision Contra Violencia Domestico, tur fundacion y cu tur esnan cu ta traha den departamentonan pa proteha derecho di nos ciudadanonan y uni na e campaña mundial di conscientisacion contra violencia y discriminacion di hende y mucha muhe. Ban hunto pone luz riba e tema crucial aki y para hunto pa cambio.