Aruba su hotel No. 1 tambe a wordo honra pa responsabilidad social
EAGLE BEACH, Aruba – 25 di November, 2024 – Bucuti & Tara Beach Resort, Aruba, ta briya como e honrado di e 2024 Caribbean Hotel & Tourism Association’s (CHTA) Caribbean Hospitality Industry Exchange Forum (CHIEF) pa e categoria di Desaroyo y Apoyo pa Personal (Empleado). E resort na Eagle Beach sa cu su personal ta e curason di su exito, y awor henter Caribe sa con profundo e ta cuida su team di profesionalnan di hospitalidad. Aparte di e honor maximo aki, e resort a wordo nombra como e prome finalista den e categoria di Responsabilidad Social pa su trabou extenso den cuido di su comunidad y isla. CHTA tambe a invita Crescenzia Biemans, Chief Corporate Officer di Bucuti & Tara, pa comparti tocante e esfuersonan den media social cu ta sobresali di e resort.
CHTA CHIEF 2024 na Miami
E Caribbean Hotel & Tourism Association’s (CHTA) Caribbean Hospitality Industry Exchange Forum (CHIEF) annual a tuma lugar na Miami, FL, 18 – 20 di november. CHTA ta un federacion di 32 asociacion nacional di hotel, cu mas cu 600 miembro di hotel y 300 miembronan aliado. Su evento CHIEF ta e evento principal di Caribe pa networking, educacion y intercambio di e mihor practica, cu ta inclui sesion nan di experto y e Exchange Hub.
E premionan CHIEF ta un caracteristica altamente anticipa tur aña ya cu miembronan ta busca pa reconose y siña for di e mihor practicanan den industria. Entreganan estilo estudio di caso pa Benta y Mercadeo Inovativo, Desaroyo y Apoyo pa Personal (Empleado), Responsabilidad Social, Transformacion di Tecnologia y Sostenibilidad Ambiental, di cual Bucuti & Tara ta e unico ganado di Hall of Fame desde 2023, ta wordo revisa pa un panel di huesnan cu ta representa profesionalnan di e industria mas halto den nan respectivo areanan cu despues ta hasi nan seleccion nan.
“Ta un tremendo honor pa Bucuti & Tara Beach Resort gana e CHTA CHIEF Award 2024 pa Desaroyo y Sosten di Hende (Personal) y ta e prome finalista pa Responsabilidad Social pasobra tur dia nos ta wak con nos por duna e mihor apoyo na nos hendenan, comunidad y e planeta, y pa wordo reconose pa yuda nos hendenan biba un mihor bida tanto profesional como personal ta un gran honor,” Crescenzia Biemans, Chief Corporate Officer di Bucuti & Tara Beach Resort, Aruba ta comparti.
Aruba su top dunado di trabou como un di e top 25 mihor hotelnan di mundo
Bucuti & Tara su cuido progresivo y amplio pa su asociadonan tan stima a wordo honra cu e Premio CHTA CHIEF 2024 pa Desaroyo y Sosten di Hende (Personal). E resort a wordo reconoci pa su metodo di 360° cu un compromiso firme y entusiasmo pa nutri, desaroya y cuida su asosiadonan, un cuido cu ta extende nan famianan y finalmente e comunidad di e isla.
Como un di e mihor resortnan di mundo segun miyones di reseña di TripAdvisor y otro plataforma prestigioso manera Conde Nast y Travel + Leisure, Bucuti & Tara sa cu su lugar di trabou ta exigente tanto den operacion como den competencia pa keda den e punta di .001% di mas cu 1.6 miyon hotel mundialmente. Door di prepara y cuida cada miembro di personal, nan ta logra entrega experiencia di vakantie unico, mientras cu nan mes ta sinti nan mes balora, sosteni y empodera pa sobresali tanto profeshonalmente como personalmente.
Aspectonan sobresaliente di e programa premia di e resort
Desde cu ela habri na 1987, Bucuti rapidamente a bira un empleador deseabel, guia pa su compromiso na su hendenan, luga y planeta. Como un hotel independiente, e resort ta enfoca riba balora, apoya y empodera su personal pa sobresali tanto na trabou como den nan bida personal . Esaki ta evidente den e nivel halto di retencion di personal, satisfaccion di huespednan, y su ocupacion cual ta 97% durante henter e aña,, hunto cu lasonan fuerte den comunidad.
Aspectonan mas importante di e Programa Premia di Bucuti ta inclui, pero no limita na:
Dunado di trabou di oportunidad Igual. Desde su fundacion na 1987, e resort ta un luga di trabou progresivo y ta aproba pa IGLTA/TAG, proporcionando oportunidadnan igual pa miembronan di e comunidad LGBTQ+. Ademas, e resort ta ofrece entrenamento continuo den Diversidad, Igualidad y Inclusion pa asegura cu ningun hende ta enfrenta discriminacion basa riba rasa, religion, of genero, y hende muhernan ta ocupa posicionnan di liderazgo na e resort, incluyendo representacion den e team ehecutivo.
Beneficionan Comprehensivo. E resort ta paga un sueldo mas halto cu e living wage, cual ta mucho mas halto cu e salario minimo legal, ta provee un entrada mas halto cu e promedio, y beneficionan cu ta inclui: un siman di trabou di 5 dia, dianan liber paga, te cu 27 dia di vakantie basa riba aña di servicio, varios bonusnan, descuentonan den tienda, seguro medico, dental, di bista, bida y trabou, apoyo pa salud mental y desaroyo continuo, un programa di spaar cu interes di 3% (unico y diferente di cualkier banco), prestamo cu interes abou y green loans pa compra sostenibel, membrecia di gimnasio, cuminda saludable, entrenamento continuo, y educacion incluyendo programa di universidad, curso profesional y hopi mas.
Cuido di Salud Avansa. Uniendo cu e ofertanan amplio di servicio medico, nobo pa 2025, ta cuido preventivo especifico pa genero, subsidio pa cuido di mucha, y e iniciativa di bienestar BucutiActive.
Integracion di AI. Herment inovativo ta wordo implementa pa empodera personal y yuda nan ta mas eficiente, sin reemplaza nan.
Inversion den Comunidad. Un enfoke riba empleo local incluyendo celebracion di e cultura di personal y nan famia, atraves di receta ancestral cu ta wordo usa den e menu Autentico Arubano y Caribense di e resort, cuido pa mascotanan atraves di Stimami Sterilisami cu e resort a funda y ta financia, y su reserva natural, The Bucuti Tara – GMC Nature Preserve, cu ta cubri un area di 130,000 m² di tereno protegi na Noord pa futuro generacionnan.
Den 2024, Bucuti a honra 56 di su 159 Asociadonan pa nan servicio, cu 61% ta emplea pa 10 aña of mas. Cu 37 aña di reconocementonan, incluyendo Tripadvisor su Hotel No. 21 den Mundo, y honornan di Condé Nast Traveler, Travel + Leisure, y Forbes Travel Guide, e exito di Bucuti ta basa riba excelencia den hospitalidad, sostenibilidad, y relacionnan autentico entre su personal fiel y huespednan.
E exito aki ta posibel pasobra Bucuti & Tara ta crece hunto cu su hende.
Fuera di vakantie: E compromiso continuo di Bucuti & Tara na responsabilidad social
Bucuti & Tara ta e prome y unico hotel certifica carbono-neutral den Caribe y pronto Net Zero. E resort ta e contribuidor di hospitalidad mas enfoca riba solucionnan y accion na e comunidad di e isla. Bucuti & Tara ta comprende cu mientras Aruba por ta hopi desea pa bishitantenan cu ta keda pa algun dia, pa e comunidad y naturalesa eta un hogar pa bida largo. Manera e doño/CEO, Ewald Biemans, semper ta bisa, “Na Aruba nos no ta den negoshi di turismo, nos ta den negoshi di naturalesa, pasobra sin naturalesa, no tin turismo ni futuro.” E exito di e resort ta demuestra cu sostenibilidad, vakantienan inolvidabel, y ta un bon bisiña por bai man den man.
Bucuti & Tara a wordo honra como e prome finalista pa e categoria di Responsabilidad Social den e Premio CHIEF di CHTA. Cu decada di ta un partner di e comunidad activo y dedica, e honor di e aña aki ta enfoca riba su iniciativa inovador di Stimami Sterilisami y su donacion y desaroyo di The Bucuti Tara – GMC Nature Preserve.
Stimami Sterilisami, a wordo funda pa Bucuti & Tara na 2016 como un solucion humanitario pa e problema di sobrepoblacion di mascotanan di Aruba. E programa ta enfoca riba subsidia e costo di procedura di sterilisacion pa doñonan di mascota y organisacionnan di rescate. Te awor, Stimami Sterilisami a sterilisa y castra casi 40,000 mascotanan. Ademas, e fundacion ta sigui boga pa cuido responsabel di mascotanan y ta crea consientisacion bou di e comunidad.
The Bucuti Tara – GMC Nature Preserve a wordo funda na fin di 2018 como un regalo pa e futuro generacionnan di Aruba di parti Bucuti & Tara, su Doño/CEO Ewald Biemans, y su amiga pa bida Greta Marie Case. E tereno aki di 32 acre/13 hectar den Noord ta protegi pa semper. Actualmente den progreso na Fase 1 di reforestacion den colaboracion cu e organizacion Ban Lanta y Planta, e reserva natural ta sirbi como un espacio di union pa hende di tur edad. Residentenan, bishitantenan, entidadnan gubernamental, negoshinan local, y organisacionnan ta uni forsa, stimula pa un pasion comparti pa proteha e flora y fauna unico di Aruba. Mas cu 750 palo ya a wordo planta y actualmente ta agregando camindanan di naturalesa nobo. Ora cu e preserva ta completamente desaroya cu un aproximado di 15,000 palo indigena, e preserva, cu ta funciona como un carbon sink, lo absorbe 375 tonelada di emisionnan di CO2 anualmente.
Continuando e legado di comparti e mihor practicanan
E Chief Corporate Officer di e resort, Crescenzia Biemans, tabata honra pa sirbi como un panelista destaca durante e sesion di CHIEF: Leveraging Social Media to Immerse and Inspire. Bucuti & Tara ampliamente ta wordo celebra entre e marcanan turistico di Caribe pa su compromiso autentico, destacando experiencianan cultural genuino y contamento di storia interactivo. Durante e sesion, Biemans a comparti strategianan pa usa medionan social pa refleha e identidad unico di e resort, fortalece conexion entre huespednan y asociadonan di Bucuti, integra cultura local di Aruba den contenido online, y construi relacionnan significativo cu ta resona cu biaheronan global.
E panel tabata diseña pa ta hopi interactivo, invitando participacion activo di e publico. Participantenan a wordo anima pa pone nan mes pregunta, creando un intercambio dinamico di ideanan y bista, enbes di sigui un formato pre-escrito di Q&A. Biemans a detaya con e canalnan di medio social di Bucuti & Tara ta wordo personaliza pa cada plataforma, buscando huespednan y bishitantenan potencial na e lugarnan unda mas nan ta prefera di interactua. Biemans a enfatisa cu e contenido di e resort ta refleha su tres pilar fundamental—Romance, Bienestar y Sostenibilidad—treci na bida door di imagen bibo y contamento di storia yena cu emocion. Na e curason di esaki ta e asociadonan di Bucuti y su huespednan, asegurando un bos autentico cu ta amplifica e experiencia real di Bucuti & Tara.