ORANJESTAD – Awe mainta, e hombernan A.Laveist y G.Boekhoudt a presente dilanti Hues di Corte di Husticia pa scucha nan sentencia. Ambos ta wordo haya culpabel di ta envolvi den e importacion di 100 kilo di cocaina.
Tratamento di e casonan aki a sosode separa pero ayera e sentencia tabata hunto. For di investigacion ta mustra cu defunto Wernet, dia 15 Januari 2023 a acerca un piscado pa trece 100 kilo di cocaine. Ta papia cu e lote lo a sali 80 mil Dollar y cu Wernet a paga 28 mil Florin pero a keda debe 112 mil Florin. Tin declaracion di testigo cu ta bisa cu e ta kere cu Wernet a mata su mes door di e presion cu tin riba dje pa paga e 112 mil florin. Tambe tin combersacionnan cu a scucha entre Boekhoudt, Heyliger, Wernet, e sospechosonan R., J. y e piscador Laveist.
10AÑA DI PRISON EXIGI
Recien, Corte di Husticia a trata e caso contra Boekhoudt, kende ta wordo acusa:
– di a yuda importa droga;
– saca secreto di Guarda Costa;
– mal uso di su funcion;
– di a wordo cumpra;
– forma parti di un organizacion criminal
Ta asina cu Fiscal a exigi 10 aña di prison pa Boekhoudt
5 AÑA DI PRISON EXIGI PA PISCADO
Corte di Husticia recien a trata e caso penal cu Ministerio Publico a cuminsa contra e piscador A. Laveist. Ta sospecha Laveist di ta esun cu a trece lote di droga entre 1 Januari 2023 te cu 13 Februari 2023. Fiscal a exigi 5 aña di prison p’e.
SENTENCIA
Ayera mainta Hues a dicta sentencia promer pa Laveist y despues Boekhoudt. Hues a bisa cu e ta haya legalmente proba cu Laveist tabata esun cu a trece 100 kilo di cocaine. Pa cu e castigo, Hues a bisa cu e ta tene cuenta cu actualmente Laveist ta sintando castigo di 5 aña di prison pa e lamentable caso di e dama Yohana, cu riba 22 Maart 2023 a perde riba laman. Hues a condena Laveist na 4 aña di prison.
Despues a drenta sala di Corte, Boekhoudt. Hues a bisa cu e ta haya legal casi tur e acusacionnan. Hues no ta haya proba cu Boekhoudt tabata envolvi den e caso di Yohana. Hues a cuestiona e hecho cu un miembro di Guarda Costa ta haci algo asina. Hues a condena Boekhoudt na 8 aña di prison y cu pa 13 aña e no por traha ningun caminda den Gobierno.