Iglesianan Cristian di Aruba (ICA) for di 2013 ta lucha pa nos pueblo y nos Parlamento comprende e balor di moralidad den politica. Politica ta e arte di goberna y bon gobernacion no por ta liber di moralidad. Nos por constata cu tin un deficit di moralidad na Aruba den e ultimo añanan. Na 2022 mayornan a bin descubri cu clandestinamente algun maestro tabata siña nan yiunan e ideologia di genero den enseñansa bascio. Na 2023 un barco crucero yen di homosexual masculino a bishita Aruba y cayanan di Oranjestad a bira scenario di actonan inmoral den publico door di e bishitantenan aki. Na 2024 Aruba gobierno di Aruba a cay pasobra algun Parlamentario no tabata contento cu Parlamento a rechasa matrimonio di mesun sexo.
Iglesianan Cristian kier a enfatisa cu e rechaso di matrimonio di mesun sexo tabata Dios su manera di spierta pueblo di Aruba cu awor ta e ora pa lanta y actua contra e rumbo di inmoralidad di e ultimo añanan. E voto moral den e proximo eleccion mester trece moralidad bek den Parlamento. Moralidad ta encera cu matrimonio y famia mester haya proteccion den nos constitucion. Moralidad ta encera cu nos gobernantenan mester scucha pueblo pa medio di un referendum riba temanan delicado y controversial. Pa un referendum ta valido mester bin cambio den nos constitucion.
E voto moral na 2024 ta pa percura cu despues di e proximo eleccion Aruba ta haya diescuatro homber y muhe cu lo vota pa cambia nos constiticion pa di e forma aki garantisa cu matrimonio y famia ta haya e proteccion necesario contra atakenen den area di moralidad. E voto moral ta mucho importante pa bay pa un partido cu a declara cu e ta na fabor di inmoralidad. E voto moral ta mucho importante pa bay pa un partido cu a haya mas cu cinco shen firma pa participa na eleccionnan anterior pero durante eleccion mes no a logra haya suficiente voto pa drenta Parlamento. Pueblo mester haci un esfuerso pa e voto moral no bay pa un di e dies Parlamentarionan cu a vota na fabor di matrimonio di mesun sexo na mei y juni 2024.
Embahada Cristian Aruba, cu ta resorta bou di ICA, lo tene uncuesta e siman aki ainda bou di tur partido politico y publica e resultado prome cu eleccion pa asina nos pueblo por haya mas dato concreto di e candidatonan cu ta digno di e voto moral.
Iglesianan Cristian di Aruba