Den cuadro di e siman di consientisacion dedica na e heroe nacional Boy Ecury
E aña aki ta conmemora 80 aña cu Aruba su Heroe di Resistencia di Segundo Guera Mundial, Segundo Jorge Adelberto ‘Boy’ Ecury a wordo fusila na Hulanda. Den cuadro di esaki Museo Arkeologico Nacional Aruba (MANA) a organisa un exposicion ‘Libertad’ cu obranan di e artistanan femenino Elisabeth Ollé Curiel, Suelyn Dankerlui, Giolina Henriquez y Vanessa Paulina.
Minister di Cultura Xiomara Maduro a presencia un bunita programa cu tabata consisti di e poesia ‘Libertad’ declama pa e hoben Genevan Maduro , un cantica ‘Pakico Guera’ canta pa e muchanan di Coro Tutti Fruti diriji pa Maybelline Arends-Croes y tambe un monologo ‘E Hereo Lubida’ presenta pa e studiante Pierre Sully Jourdain. Despues cu sra. Pauline Smith a duna un splicacion di e exposicion ‘Libertad’ y e artistanan, e mandatario a dirigi palabra na tur e presentenan.
Durante su discurso, Minister Xiomara Maduro a gradici tur esnan cu a contribui y cu lo sigui contribui na comemoracion di e fusilamento di Boy Ecury, 80 aña pasa pa e Alemannan na Hulanda. Alabes ela menciona e iniciativa pa declara un ‘Dia di Conmemoracion Nacional’ riba 6 di november pa reconoce tur luchador di libertad di Segunda Guerra Mundial den Reino Hulandes. Un palabra di aprecio a bay tambe na e artistanan Elisabeth Ollé Curiel, Suelyn Dankerlui, Giolina Henriquez y Vanessa Paulina, cu pa medio di nan obranan ta expresa e speransa di Libertad. E dignatario a gradici tambe e ekipo di MANA pa nan dedicacion continuo pa comparti cu nos comunidad y bishitantenan e rikesanan di nos arte y cultura.
Na final di su discurso, e mandatario a yama e artistanan Elisabeth, Suelyn, Giolina y Vanessa pa cana hunto cune pa paga tera y reconoce nos antepasadonan bayendo direccion di e exposicion. Den un acto simbolico, Minister di Cultura Xiomara Maduro a basha e bebida cu tin den un calbas, dilanti di cada porta. Esaki ta un tradicion, un custumber di antes pa gradici nos antepasadonan. Cu e acto simbolico aki e dignitario a haci e apertura di e exposicion ‘Libertad’.
E mandatario ta invita un y tur pa pasa bishita e bunita obranan di e artistanan Elisabeth Ollé Curiel, Suelyn Dankerlui, Giolina Henriquez y Vanessa Paulina na MANA. E exposicion lo keda habri te diahuebs 5 di december.
