Milanka a yega trankil Hospital riba su dia liber specialmente pa atende un reunion importante cu su manager. Un tremendo shock ela haya asina cu ela habri e porta di sala di reunion y ela scucha yen colega grita “surprise”. Pa Milanka e tabata un momento yena di emocion ora ela ripara cu ela bira empleado di luna. Su coleganan di departamento di emergencia hunto cu cu team di avondhoofd a nomina Milanka den cuadro di su impresionante trayecto na hospital y tambe su colegialidad.
Milanka tin un funcion combina unda cu e ta fungi 50% como enfermera na departamento di emergencia cu tareanan di coordinacion y e otro 50% e ta traha como avondhoofd unda cu e ta coordina y ta e persona di contacto anochi na Hospital pa cualkier situacion cu por surgi.
Coleganan ta describi Milanka como un tremendo teamplayer cu ta dirigi su team cu’n actitud positivo y proactivo. E ta comunica di un forma habri, cla y cu respet cu ta laga coleganan sinti nan mes safe y alabes scucha. Tambe e ta stimula nan pa duna nan opinion y feedback y di e manera aki ta contribui na un ambiente riba su departamento cu ta promove un cultura di colaboracion y di confiansa.
Ademas, durante anochi e ta percura pa tareanan wordo ehecuta na un manera structura y eficiente y ta responde lihe riba situacionnan cu surgi. Milanka ta un persona responsabel cu ta gusta yuda coach y guia coleganan. Manera coleganan mes ta expresa: “Milanka ta nos pilar di sosten”.
Durante su carera na hospital ela demostra su talento di liderazgo y dedicacion na mehora e calidad di cuido. Su experiencia diverso den cuido medico, su experiencia den pasado unda e la fungi como ‘persona di confiansa’ y su participacion na diferente comision ta haci cu Milanka ta un forsa indispensabel pa su team. Merecidamente ela wordo nomina y scogi como empleado di luna na HOH. Hunta di Directiva, management y tur colega ta hopi contento di tin Milanka den nan team. Pabien Milanka cu e tremendo reconocemento aki!
FIN