311
Oranjestad – Diamars mainta partido AVP a tene un rueda di prensa, unda cu a hiba palabra Sr. Cicilia y tambe Sr. Eman. Sr. Eman a splica con si AVP drenta gobierno bek, con nan lo haci e 50% di aumento di pensioen realistico. Eman a papia di e vergrijzing cu tin actualmente y kiko nan lo bay haci.
NOS HOBENNAN
Segun Eman; nos hobennan lo ta esnan cu tin cu bay carga e peso di nos grandinan cu a traha duro pa e isla aki.
Eman a bay mas leu indicando cu e peso adicional pa yuda paga pa e grandi lo bay cay ariba nos hobennan.
Hobennan segun Eman y Cicilia lo mester bira solidario pa cu e aumento di e 50% ariba e pensioen cu e partido ta campañando cu ne. Cu otro palabra nos young professionalnan y tur otro hoben trahando riba nos isla lo tin cu bay entrega un parti di entrada pa esaki por wordo realisa.
Den su discurso, e ta bisa cu e hobennan mes kier yuda carga e peso aki; pa pone un calidad di bida husto pa nos grandinan cu a sacrifica gran parti di nan bida pa lanta e pais aki.
GOBIERNO ACTUAL TIN 500 MIYON FLORIN EXTRA DEN CAHA
E la sigui papia tambe di e maneho financiero cu e Gobierno aki a hiba y cu nan a logra cera 500 miyon florin extra den caha di Gobierno, compara cu tempo nan tawata den Gobierno, nan no logra un caha di Gobierno cu un surplus. Nan tin den nan plan di campaña pa uza e Surplus di e gobierno actual. Entre otro un parti tambe lo wordo uza adicionalmente riba locual e trahadonan hoben lo bay entrega, pa asina por cumpli cu Avp su plan pa acomoda e aumento di 50% ariba e pensioen di nos grandinan.
Segun Eman, AVP su plan di aumento di pensioen, ta e tema central di AVP su campaña. Tambe e la sigui bisa cu e plan aki a wordo investiga y realisa door di tres academico; uno na South Carolina, y dos academico di Universidad di Aruba.