ORANJESTAD – Diabierna merdia abogado mr. Canwood, kende a representa Nelson de Andrade (Speed), N.G y Brian Koolman, a cuestiona e forma con Fiscal ta persigui e periodistanan y a exigi pa declara nan liber.
ARUBA NATIVE por a compronde cu mr. Canwood ta haya cu Fiscal kier mina libertad di prensa.
Despues di a scucha Fiscal exigi 2 aña di prison pa Speed, 18 luna di prison di cual 8 luna ta condicional cu 3 aña di prueba pa G y L y 6 luna di prison condicional cu 3 aña di prueba pa Koolman, mr. Canwood a bisa Hues cu e ta haya cu no mester culpa su clientenan pa fayo cu ex agente Vos a haci.
NO TABATIN CUMPRAMENTO DI VOS
E abogado ta haya cu mester declara Giel, Andrade y Koolman liber. Mr. Canwood a bisa Hues cu Vos ta bisa cos cu no ta cuadra cu e berdad. E abogado a mustra cu den caso G, Vos ta papia manera cu el a haya placa pero Giel a splica bon cla cu e no tabata paga. Pa loke ta Speed, Vos ta papia cu e lo a haya sponsor y publicidad pero no tabata asina. No ta asina cu Vos a haya mas publicidad cu cualkier otro Polis. E abogado a mustra cu Vos ta bisa cu Koolman ta haci cosnan pa Speed. Ta pesey mes Fiscal no ta haya Koolman culpable di a cumpra Vos.
E abogado a desmenti e declaracion di Vos cu Speed a financia e aparatonan. E abogado a bisa Hues cu cada un a percura pa nan laptop y Vos ta esun cu a instala. El a sigui bisa cu Vos ta papia cu Speed a ofrec’e 1500 florin diferente biaha, pero no a tum’e. Esaki no ta berdad. Na opinion di mr. Canwood, si Vos ta fia placa pa loco, e ta duda cu si Speed a ofrece placa, e lo a nenga esaki. E abogado a splica cu Speed ta haci donancion na hendenan cu tin problema for di su saco. E hecho cu lo a treat Vos cerbez, esey ta mucho baho di Fiscal pa considera esey como a cumpra Vos.
Pa loke ta G, e abogado a bisa cu tin biaha e ta bisa Vos ta ok cu e ta yuda cu placa pero no ta haci nada. E abogado ta haya cu Hues mester declara G y Speed liber di a cumpra Vos.
NO A VIOLA SECRECIA DI POLIS
E abogado a bisa Hues cu e no ta haya cu su clientenan a viola secrecia di Polis. Ta Vos como Polis a ofrece cierto medio pa scucha. E abogado ta puntra su mes si pasobra Vos a viola e secrecia di Polis, e periodistanan tambe ta castigabel.
MINA LIBERTAD DI PRENSA
Mr. Canwood a bisa Hues cu Prensa tin e libertad di publica cosnan. Periodistanan tin e deber di publica cosnan cu no ta corecto. E ta haya cu Gobierno y Ministerio Publico no mester stroba prensa den ehercemento di nan trabao. Ora cu ta stroba prensa di haya informacion, ta stroba e libertad di prensa. E abogado a menciona articulonan di ley pa mustra cu prensa tin e obligacion di duna informacion y mester tin e libertad di prensa.
Na opinion di abogado, envez cu Ministerio Publico ta reuni cu prensa pa palabra con lo ta e mihor manera cu mester haci e trabou, ta persigui nan den Corte. El a mustra cu na October 2020 tabatin planea cu Mando Policial ta reuni cu prensa pa tin un mihor relacion di trabao. Sinembargo door e situacion di Covid, esaki no a sigui. El a mustra cu Polis ta yama prensa pa haya informacion riba cierto caso. E ta haya cu no ta Ministerio Publico pa determina con prensa mester haci trabao. Si sigui asina ta stroba prensa den haci su trabao debidamente. Ta stroba e libertad di prensa. Ta parce cu Ministerio Publico kier bringa prensa envez di traha cu prensa den casonan importante.
NO POR PAPIA DI ORGANIZACION CRIMINAL
E abogado a bisa cu su clientenan no ta culpable di organizacion criminal. E abogado ta haya cu aki por papia di un cooperacion pero no un organizacion criminal. Mr. Canwood ta haya cu Fiscal mester ta hopi cauteloso den haci expresionnan.
CASTIGO EXAGERA
Pa loke ta castigo exigi pa Fiscal, mr. Canwood a bisa Hues e exigencia di 6 luna di prison condicional por stroba Koolman den su enseñanza na Hulanda. E abogado ta haya cu Fiscal por a exigi castigo condicional pa G y trabao pa comunidad. Na opinion di abogado, e hecho cu Fiscal a exigi castigo di prison y detencion pa Speed, ta duna e impresion cu Speed ta un criminal cual no ta asina. E abogado a pidi Hues pa no duna castigo pasobra su clientenan a haci uso di nan derecho di libertad di prensa.
L a bisa Hues cu Vos a gaña algun cos. El a bisa cu desde cu Vos a cay sera, el a sigui haya informacion di Polis usando su aparatonan. L a bisa Hues cu Vos no ta e unico agente cu a haya sponsor. El a bisa Hues cu e website ta sigui traha sin Vos. El a bisa si fia hende placa of duna placa no ta cumpra. L a bisa Hues cu el a kere cu e lo a haya castigo combina y trabao pa comunidad pero a keda geschock cu 18 luna di prison.
Hues a sera tratamento di e caso y 18 December 2024 lo tin sentencia.