Secretario General di MEP Endy Croes: Prioridad # 5
Partido MEP a presenta su shete (7) puntonan di prioridad pa e proximo cuater (4) añanan, esta pa e proximo gobernacion. MEP a percura pa trece stabilidad bek den Pais Aruba despues cu e pandemia a asota mundo henter na aña 2020, alabes a percura pa crea espacio financiero cu Surplus pa asina sigui maneha Pais Aruba . Den e proximo cuater (4) añanan ta momento pa duna bek y inverti den nos conciudadanonan.
Pensionadonan:
Nos pensionadonan ta e fundeshi di nos pais. Awo cu MEP a stabilisa nos Pais Aruba tin e espacio financiero necesario pa asina por pone extra atencion pa sigui mehora calidad di bida di nos grandinan, esta nos pensionadonan.
Con MEP lo inverti den nos pensionadonan?
MEP ta priminti di sigui aumenta e pensioen di biehes, pero na un forma responsabel y sostenibel. MEP den su propuesta pa e siguiente cuater (4) añanan lo percura pa sigui reduci e peso di impuesto riba pensioen pa nos pensionadonan. Lo percura pa mehora e cuido di nos adultonan mayor, brindando un cuido di calidad y mas structura, tanto na cas y den e casnan di cuido. Alabes lo percura pa crea mas casnan di cuido. Ta percura tambe pa mehora e cuido di salud di nos pensionadonan y amplia e ekipo di doctor geriatria (doctor specialisa pa atende nos adultonan mayor).
Nos pensionadonan lo haya nan remedinan bek di AZV:
Durante pandemia, Hulanda na un manera inhusto a exigi Gobierno di Aruba pa corta 60 miyon pa aña den cuido como condicion pa ricibi 914 miyon di prestamo pa traspasa e momentonan mas dificil y fastioso den historia di nos pais, esta temporada di e pandemia (aña 2020). Na e momentonan ey, contra nos propio boluntad, obligatoriamente, a corta tambe riba cierto remedinan cu AZV tabata brinda nos grandinan. Na e momentonan aki, como cu a hiba un maneho financiero responsabel y pa di tres (3) aña consecutivo gobierno ta entrega un presupuesto cu un Surplus, tin e espacio pa duna bek na comunidad. Pues pa mehora e cuido di salud di nos pensionadonan lo percura pa e remedinan pa nos pensionadonan wordo cubri bek door di AZV. Esaki ta partinan esencial di nos compromiso pa nos pensionadonan. Cu bo voto di confiansa, dia 6 di december proximo, nos lo percura pa cumpli cu nos adultonan mayor. MEP ta priminti y MEP ta cumpli!