Oranjestad – 13 di november 2024 – Aruba Bank a duna bon bini na un grupo di dies hoben entusiasma cu a gana durante e seminario di GRIT luna pasa, cu a wordo organisa pa WOW Aruba, pa un experiencia exclusivo ‘Behind-the-Scenes”’. E sesion inspirativo aki tabata pa duna sosten pa mucha muher cu tin interes di un carera den tecnologia, y a duna e participantenan un oportunidad interactivo pa conecta virtualmente cu dos studiante prominente den industria di tecnologia. Durante e evento, e hobennan por a haci pregunta, busca conseho, y haya bon informacion pa careranan den tecnologia.
E bishita, cu tabata na Aruba Bank su sucursal na Hato, a duna e participantenan un bista unico den e ‘Payments & IT Departments’ di e banco. Durante e bishita, e hobennan tabata tin e oportunidad di topa y interactua cu e coleganan cu ta dirigi e departamentonan aki, dunando nan un comprencion directo di nan responsabilidadnan, desafionan, y e impacto cu nan trabou tin.
E compromiso di Aruba Bank pa empodera lidernan di futuro y promove diversidad den tecnologia tabata evidente durante e evento. E sesion exclusivo aki ta un di e varios iniciativa cu Aruba Bank ta duna sosten pa motiva mas interes den tecnologia pa mucha muhernan den e tereno cu generalmente ta domina pa hende hombernan.
