Oranjestad, Aruba – Departamento di Asuntonan Economico, Comercio y Industria ta invita tur hende di Aruba pa asisti na Aruba Showcase Event II, cu lo tuma luga diasabra, 9 di november 2024, na Plaza Comercio, un lugar recientemente revitaliza y ta situa na e ex parkeerplaats di Brenchie na Playa (‘schuin tegenover’ di El Gaucho Restaurant).
E evento aki ta un oportunidad unico pa bin celebra e talento local di Aruba, cu un variedad amplio di productonan di calidad halto y unico. E Aruba Showcase Event II lo presenta productonan local, creativo y original, manera pica Arubano, cosmetica natural, chuculati, arte, moda sostenibel y mas. E ta un evento familiar y tur hende di Aruba ta keda cordialmente invita pa explora y bin cumpra e productonan autentico di nos isla, mientras bo ta apoya y sostene nos empresarionan local.
Detaye di e evento:
• Fecha: Diasabra, 9 di november 2024
• Orario: 6:30 pm – 9:00 pm
• Localidad: Plaza Comercio, Oranjestad (ex parkeerplaats di Brenchie na Playa, ‘schuin tegenover’ di El Gaucho Restaurant)
• Entrada: Gratis
E banda di ‘NFuzion’ lo ta presente pa anima e publico y crea un ambiente festivo.
Departamento di Asuntonan Economico, Comercio y Industria mediante su unidad Exprodesk, ta busca constantemente oportunidadnan pa nos empresarionan local expone y bende nan productonan y servicio. Nos ta compromete na sostene y desaroya nos economia, door di sostene nos empresarionan chikito y mediano, y asina apoya nos comunidad comercial.
Nos ta invita mas empresarionan local pa haci uzo di e oportunidad pa exhibi nan productonan riba e Webpage Aruba Showcase, cu lo amplia e alcance di nan producto globalmente. E plataforma ta un gran oportunidad pa expone productonan di Aruba riba mercado mundial.
Nos ta invita e comunidad di Aruba riba Plaza Comercio diasabra awor, pa sostene nos empresarionan local y cumpra productonan autentico di Aruba.
Ban Cumpra Local y Sostene nos Hendenan!