ORANJESTAD – Dialuna 4 di november durante e Conferencia di Prensa di Gobierno di Aruba, Prome Minister Evelyn Wever-Croes, a elabora riba e mentiranan cu Parlamentario Mike Eman ta plamando den pueblo di riba tema di e debe nacional.
Prome Minister ta indica cu ta importante pa refuta informacion incorecto cu ta wordo infundi den pueblo di Aruba, e asina yama; E-manipulacion di Mike Eman. Actualmente por tuma nota cu Parlamentario Mike Eman como lider di oposicion ta usa un grafico bieu pa bruha tera cu e debenan di Aruba a subi.
Prome Minister ta accentua den e palabranan mas crioyo posibel, cu Aruba tin dos aña sin presta un debchi. Y Aruba tin dos aña ta pagando debe y logicamente esey kiermeen cu e debe ta baha. Parlamentario Mike Eman ta usando un grafico durante su campaña unda por wak cu el a para su conteo te na e prome kwartaal di aña 2023 unda por mira un aumento chikito di e debe. Pero e no a compar’e cu e prome kwartaal di 2024, y usando e grafico na e manera ey e ta duna un impresion falso. Pero ora mustra graficonan actual bo ta mira cu e debe ta bahando y pa 2024 e ta baha aun mas.
Ta di compronde cu e debe a subi na 2020-2021-2022, pasobra e pandemia di Covid19 a pone cu mester a presta placa pa yuda esnan cu a perde trabou, y yuda comerciantenan pa no bati bancarota. Y den e prome kwartaal di 2023 a ricibi e ultimo fiansa pa paga e ultimo fase y subsidio di salario.
“Pues Lider di oposicion Eman ta usando grafico cu datonan bieu pa spanta y manipula e pueblo y ta di lamenta paso e Lider di oposicion tin e informacion nobo y corecto unda ta indica cu e debe ta bahando. Mi ta ripiti, Aruba tin dos aña sin presta un debchi y cu e echo ey y pagando debe, ta significa cu e debe nacional ta baha, y esaki ta yama: un maneho financiero responsabel”, Prome Minister a indica.