Recientemente Minister Maduro di Finansa a ricibi sra. Charline Kelly y su coleganan di Central Accountantsdienst CAD pa felicit’e pa su 25 aniversario den servicio publico. E mandatario y director di CAD sr. Pang a hiba palabra den cual nan a conta di e trayectoria di Charline na CAD.
Charline a drenta den Servicio di Gobierno prome di november 1999. Despues cu el a termina su estudio na Financieel Economisch Faculteit (FEF) na Universidad di Aruba, Charline a bin traha na CAD den e rango di Asistente di Accountant. Charline ta un persona cu por traha cu tur hende. Hopi agradabel, simpatico, comprensivo, bon sentido di humor y cu un bon curason pa semper para cla pa duna su coleganan un man. Charline semper t’ey pa su coleganan. Tambe e ta hopi aprecia y keri pa su ex coleganan. Semper e ta keda den bon contacto cu su ex coleganan.
Charline den su 25 añanan di trayectoria trahando na CAD, a tuma diferente encargo di investigacion y/of control bou guia di chef di controlador. Charline a haci diferente trabou independiente cu ta resorta directamente bou di director. E hubilario no a sinta keto durante su aña nan na CAD. Continuamente e ta haci todo por todo cu tur su afan pa e bay dilanti pa rekeri mas conocemento pa su trabou door di curso- y tayernan.
Ta bunita pa mira, ora un empleado publico haya un encargo y ta hinca su mes 100% den dje pa e haci e trabou na un manera satisfactorio. Charline ta orienta su mes den e tarea y analisa e problema te ora e tin un bon bista di tur cos cu ta relevante pa e control/investigacion cu e ta bezig cu ne. No por keda sin menciona cu Charline realmente ta un persona hopi critico den su trabou. Esey ta trece cune cu Charline ta bay extra miles cu e tareanan cu e mester eherce. E ta busca tur sorto manera pa e drenta den e nucleo di e problema.
Charline ta mama di 3 yiu y ta masha remarcabel cu e tin hopi amor mes pa su nieto cu ta su pret’i wowo. Nos kier enfatisa cu Charline ta un persona hopi social y semper cu un sonrisa riba su cara. Semper e ta gusta participa na tur actividad di CAD.
Pa e ocasion special, Minister Maduro a presenta sra. Charline Kelly cu su decreto gubernamental y tambe un regalo pa gradici’e pa e 25 aña dedica na servicio di comunidad.