ORANJESTAD – Dialuna mainta tabata tin un conferencia di prensa di Gobierno di Aruba na unda Prome Minister Evelyn Wever-Croes hunto cu Minister di Husticia Rocco Tjon a elabora riba e pruebanan cu tin pa demostra cu e acusacionnan haci pa oposicion riba e tema di metemento den Ministerio Publico (OM) ta falso.
Minister Tjon a splica cu riba e fecha di 24 di October, el a manda un carta pa (OM) pa pidi un reaccion di nan banda riba e acusacionnan cu ta wordo haci pa oposicion, y si OM tambe por aclarea si ta berdad cu OM y DRH por coopera cu otro pa den casonan disciplinario informacion wordo comparti. Riba su carta, Minister Tjon a ricibi un contesta dia 30 di October na unda OM ta indica cu desde 2006 tin un protocol firma na unda OM por comparti informacion cu DRH ora tin casonan andando, y cu a base di e protocol aki informacionnan ta wordo comparti y no por medio di instruccion.
Prome Minister a indica cu e acusacionnan cu ta wordo haci pa Parlamentarionan Marisol Lopez-Tromp, Aquanette Gunn y Miguel Mansur ta cu tabata tin un caso na unda un director di un departamento tabata un sospechoso, y den e caso aki DRH a haya informacion di OM, cual pa nan ta contra ley y ta metemento indebido den OM.
Prome Minister a splica cu e prome base legal pa haci intercambio di informacion ta por medio di un protocol firma na 2006 entre OM y dos departamento di Gobierno di Aruba na unda a palabra cu lo bin un protocol preparando pa cambio di ley.
E di dos base legal ta wordo haya den e ley di 2011 “landsverordening persoonsregistratie Aruba” cu ta combina cu e ley “landsverordening op het Openbare Ministerie” cu ta un ley di 1993. Pues e base legal ta 2011 y 1993 cu hunto aparte di e protocol ta intercambia informacion.
E cooperacion aki ta importanta pa evita kiebro di integridad y pa combati corupcion. P’esey ta importante pa tin palabracionan haci cu instancianan cu tin informacion importante pa asina Gobierno por garantisa cu no tin corupcion mas den e aparato gubernamental. Tambe mester tene semper cuenta cu e privacidad di un persona, mirando cu esaki ta un derecho ancra.
Prome Minister a indica cu e pruebanan aki e acusacion di metemento den OM ta wordo bari di mesa. Den e caso specifico aki, e carta cu e parlamentarionan ta uzando cu nan a publica den prensa, ta un carta na unda OM a manda bisa di ta sera e investigacion riba e persona paso no a haya nada cu el a haci contra ley. Esaki sigur ta muestra cu no por tin metemento, mirando cu e investigacion ta sera.
E di dos acusacion contra Prome Minister, ta cu segun e parlamentarionan aki, Gobierno a saca informacion personal di un empleado publico. Pero e realidad ta cu ta nan a saca e informacion aki. Nan a haya e documentonan y nan a publicanan. Ningun momento Gobierno a saca informacion cu ta viola privacidad di un empleado.
“Mi kier alerta comunidad cu mayan den e reunion nan ta bay saca tur otro acusacion contra mi persona. Nan ta bay cuminsa cu mi casa, sigui pa mi yiu, mi ruman y mi tata, cual cada un di nan a gana nan caso di difamacion caba.
Nos ta mira cu loke ta pasando na Aruba ta cu nan kier destabilisa nos pais. Lamentabelmente ta forsanan aki na Aruba y Hulanda no kier wak e pais aki stabiel. Nos Gobierno a traha hopi duro pa nos ta para unda nos ta para awe, no ban permiti niun hende destabilisa nos pais. Ban keda trankil, paso mi colega Rocco Tjon y mi mes lo ta den parlamento y tin tur prueba cu nos. Boso djies keda trankil y sigui traha positivamente pa hiba pais Aruba padilanti” Prome Minister a expresa.
