‘E cos aki tawata manera un terapia pami. Mi a siña hopi di mi mes’. ‘Ya mi a cuminsa implementa varios cos cu mi yiu mas grandi’: Un tata cu a participa na e sesionan di Best Dad Ever ta duna su opinion na final di e proyecto.
For di 15 di october te cu 31 di october ultimo na Centro di Bario Lago Heights, un grupo di tata a participa na e proyecto Best Dad Ever y a finalisa Best Dad Ever cu un certificado. E tatanan a ser recluta door di Scol Caiquetio y Croon Caribe.
Desde aña 2017, 131 ta organisa Best Dad Ever cinco biaha pa aña. Best Dad Ever ta un proyecto caminda cu, durante 7 sesion tatanan y futuro tatanan ta traha ariba nan habilidadnan pa ta un mihor tata di locual cu nan ta caba. Best Dad Ever ta stimula e participacion di hende homber den educacion di nan yiunan. E tatanan ta ricibi tips, informacion y conocemento con nan por ta mas involucra den bida di nan yiu.
Estudio haci na Aruba na 2012 a mustra cu e relacion entre tata y yiu na Aruba lo ta zwak. Esaki
a pone cu 131 a laga haci un estudio mas profundo na aña 2016 pa asina aki haya un mihor bista di kiko tatanan ta pensa di nan rol den educacion di nan yiunan. Un di e resultadonan di e estudio ta cu tatanan kier ta mas involucra cu educacion di nan yiunan. Debi na esaki 131 a crea Best Dad Ever na 2016 y a cuminsa cu implementacion di Best Dad Ever na 2017.
Algun temanan cu ta parti di e sesionan ta por ehempel: impacto di un tata, planea famia, duna cuido, violencia etcetera etcetera. Algun partner cu tambe tawatatin un rol durante algun di e sesionan ta Famia Planea, partera Michael Quandt, Centro di Bario Lago Heights, Scol Caiquetio y Croon Caribe.
Best Dad Ever por tuma lugar danki na sosten di Setar N.V, Aruba Airport Authority N.V. y The Salamander Group.
Pa mas informacion tocante Best Dad Ever por tuma contacto via nos website: 131.aw, Instagram: Instagram: 131aruba, facebook: https://www.facebook.com/aruba.131, email: [email protected] of telefon 5886138/ 5884011.