Oranjestad-Aruba
Algun siman pasa DIP a constata posibel iregularidadnan durante controlnan interno.
A base di esaki hunto cu Departamento di Recurso Humano (DRH) a hasi un investigacion, “feitenonderzoek”. Basa riba e conclusionnan di e investigacion ey, DRH a entrega keho na Landsrecherche.
E caso awor ta den man di Ministerio Publico, y mas informacion por wordo duna solamente door di vocero di Ministerio Publico.
E caso aki no ta envolvi Minister di Infrastructura mirando cu e proceso di otorga tereno a wordo depolitisa (Minister no ta firma pa duna tereno) y e Minister no ta parti di e proceso, ni di e investigacion.
E dirigencia di DIP ta sigui den man di sr. Ir. Robert Maduro, manera tabata e caso den ultimo lunanan.
Gobierno di Aruba ta lamenta e caso aki. Mester bisa si cu e sistema di control interno ta funciona y asina por evita casonan di iregularidad den futuro.