ORANJESTAD – Diahuebs mainta durante e lansamento di e proyecto “Seroe Colorado World War II Memorial”, Prome Minister Evelyn Wever-Croes durante su discurso a indica cu e idea pa e monumento na Seroe Colorado di Segunda Guera Mundial a bin di señor Dufi Kock, historiado y ex-empleado di Lago. E mandatario a pasa palabra pa señor Dufi Kock pa e como historiador splica e importancia di e proyecto contando e historia di e Segunda Guera Mundial y e papel di Aruba.
Historiador señor Dufi Kock:
“Riba 16 di februari,1942, pa 1:31 di marduga, Aruba a wordo ataca pa Alemania durante di di Dos Guera Mundial. Habitantenan di San Nicolas a wordo sacudi den nan soño pa sonidonan di guera. Trahadornan di e refineria no a bandona pia di trabao y a haci tareanan peligroso durante e dianan cu a sigui pa proteha e refineria y Aruba. Aruba a bira e promer pais den hemisferio occidental cu a wordo ataca pa e regimen Nazi.
Aruba tabata hungando un rol importante pa aliadonan pa motibo cu refineria Lago tabata e mas grandi di mundo e tempo ey produciendo y entregando e gasolin pa avionnan di aliadonan por a bula y defende Inglatera den e bataya di Gran Britania y gana e Guera na Europa contra Hitler.
Submarinonan Aleman a ataca tankeronan den waf di Aruba y esnan biniendo for di Venezuela, matando trahadonan di Lago riba e tankeronan Pedernales, Oranjestad ,Tia Juana y San Nicolas. Den apenas tres ora y pico, 47 persona a perde nan bida, entre nan 12 Boneriano. E echo cu Capitan Hartenstein di e submarino Aleman U-156 no a mira e tankero SS Hooiberg cu net na e momento ey tabata biniendo na e mesun sitio pa hancra, a evita cu mas victima a cay. Tambe e submarino U-156 a manda cañon riba e refineria, pero ningun a dal e 3000 tonelada di explosivo riba e waf, sino parti grandi di nos isla lo a wordo afecta, specialmente San Nicolas.
Despues soldanan Americano a yega Aruba pa reemplasa e soldanan Britanico y na Seroe Colorado nan a construi cuatro structura pa cañon grandi, dos bunker y un spotlight potente, tur esaki pa proteha Lago y Aruba.
Nos semper lo corda e frase di nos heroe di Segunda Guera Mundial, Boy Ecury; ‘Den cas di mi tata, no tin luga pa traidor’, ken na un edad hoben di 22 aña a entrega su bida pa no muri como un traidor, pero como un heroe”.