ORANJESTAD, Aruba 2 di november 2024: Parlamentario Ricky Hoek di Fraccion di MEP a implementa diferente iniciativa cu ta enfoca riba bienestar social y sostenibilidad pa hobennan y persona cu limitacion fisico na Aruba.
Durante 2022-2023, su trabou den Parlamento a inclui mocionnan pa aumenta e apoyo legal y infrastructura di apoyo pa hopi persona vulnerabel den comunidad. Un di e logronan mas sobresaliente di Hoek ta su mocion pa yuda cu desaroyo di infrastructura pa hobennan cu ta den detencion. E mocion aki a bira realidad cu ayuda di Minister Rocco Tjon y Minister Endy Croes, y esaki a trece infrastructura nobo pa asisti e hobennan mientras ta cumpli cu nan detencion, duna nan oportunidad pa sigui desaroya y crece den un ambiente mas safe y forma positivo pa nan futuro.
Tambe, Hoek ta trahando riba e creacion di un “Jeugdwet” pa compila y organisa tur ley cu ta aplica na hobennan y pa introduci ley nobo pa nan proteccion. E “Jeugdwet” ta enfoca riba integracion di leynan actual y pa incorpora necesidadnan specifico di hobennan, crea mas structura pa proteccion y apoyo legal.
Otro esfuerso notabel ta su mocion entrega na 2022 pa amplia e cantidad di parkeerplaats publico pa hendenan cu limitacion fisico. Hoek a entrega e mocion na Minister di Transporte pa aumenta e cantidad di parkeerplaats y reenforsa nan uzo na un manera cu ta mas facil. E ministerio ta trahando riba e ehecucion final di esaki pa amplia e accesibilidad pa e grupo aki den comunidad.
Un otro punto di enfoke ta e creacion di un “rechtswinkel” pa hobennan entre 12-27 aña. E proyecto ta propone pa trece un espacio pa yuda hobennan cu informacion y orientacion legal riba asuntonan cu ta afecta nan bida, manera contractonan di vivienda y pago di DUO. E posibilidad cu Hoek ta propone ta den plan di implementacion pa 2024-2028 y tin como meta pa yuda hobennan ta mas prepara y consciente riba nan derechonan y responsabilidadnan legal.
Parlamentario Ricky Hoek su esfuerso ta contribui pa un futuro mas accesibel y inclusivo pa hobennan y e comunidad vulnerabel di Aruba, trece cambio y desaroyo social cu ta beneficia tur miembro di e comunidad.