Aruba ta conta cu Consulnan General y Consulnan Honorario
ORANJESTAD – Consulnan ta representa diferente pais y ciudadanonan na pais Aruba y ta eherce un trabou hopi importante. Prome Minister Evelyn Wever-Croes, como minister encarga cu relacion exterior na Aruba, regularmente ta reuni cu Cuerpo Consular di Aruba cu ta representa e consulnan. Durante e ultimo reunion dia 31 di october a atende cu varios punto di interes general di tur consul y tambe pa mira con mas ainda, por fortifica e posicion di e consul na Aruba.
Un consul ta un posicion diplomatico sumamente importante den un pais unda semper e pais ta dunanan e cortesianan di mas halto. Den e aparato gubernamental di Aruba varios departamento tambe ta traha hunto cu consulanan, principalmente Departamento di Relacion Exterior cu ta coordina tur trabou pa e consulnan.
Ta importante pa subraya cu un consul tin un posicion diplomatico y ta wordo respeta mundialmente pa cu esey. Aki na Aruba tin Consul General cu ta un consul di carera y Consul Honorario, cu banda di nan carera ta atende cu trabounan consular pa un pais. Usualmente un pais cu tin un representacion grandi di ciudadano tin un Consul General y un pais cu no tin un representacion grandi pero igual di importante, tin un Consul Honorario.
Prome Minister den nomber di pais Aruba, tin un aprecio grandi pa e trabou cu cada consul ta haci representando nan ciudadanonan y e mandatario semper ta traha pa sigui mehora e relacion y comunicacion entre Gobierno y e consulnan.
Un biaha pa aña Gobierno di Aruba bou liderazgo di Prome Minister ta organisa un recepcion pa honra y gradici tur consul, usualmente durante un fecha cerca di celebracion di Himno y Bandera y di e manera aki reitera e gradicimento na cada consul pa e trabounan cu nan ta haci pa yuda hiba pais Aruba padilanti.
Aparte di esey Prome Minister tin reunionan periodicamente cu Cuerpo Consular unda ta atende aspectonan organisatorio y aparte di esey tambe e mandatario ta atende cu consulnan indiviualmente. Tambe Prome Minister ta reuni cu embahadornan ora nan bishita Aruba y asina fortifica relacionnan internacional cu pa Aruba ta hopi importante.