22
Ta un placer pa Organo Ehecutivo AZV (OE AZV) informa su aseguradonan cu e team encarga cu e negociacion di contractonan nobo cu clinicanan di Colombia ta casi yega e ultimo etapa di e destaho publico.
E trayectoria di escogencia di e clinicanan a keda concretisa pa medio di tres punto di atencion principal, esta:
-
Calidad medico;
-
Eficacia di proceso, incluyendo e experiencia di pashent na Colombia e.o e tempo di espera pa haya afspraak.
-
Finanzas.
Banda di e tres puntonan aki, cada clinica por a “score” extra punto na momento cu nan oferta ta encera solucionnan creativo pa por ehempel tarifa, cierto situacionnan medico di pashent, estilo di maneho y descuento di tarifa. Pa percura cu OE AZV haya mas sosten posibel den nan escogencia di clinica, a busca un auditoria obhetivo tambe pa verifica e proposicionnan (ofertanan) financiero e.o basa riba casonan medico real.
Bishita di Colombia
Entre tanto, basa riba analisis extenso AZV a haci su escogencia. Recientemente nos a haya bishita di tres clinica di Colombia cu a keda selecta, esta Fundacion Valle de Lili (Cali), Hospital Pablo Tobón Uribe (Medellín) y Fundación Cardioinfantil (“La Cardio”, Bogotá). Durante e bishita cada clinica a haya e oportunidad pa duna nan presentacion y intercambia informacion clave tocante nan servicio y oferta. Pa haci miho uzo di e presencia di e clinicanan Colombiano na Aruba, OE AZV a percura pa un agenda di actividad cu tabata encera diferente bishita na entre otro Horacio Oduber Hospital y ImSan. Asina a brinda cada clinica Colombiano e oportunidad pa nan tambe haya un miho bista di kico tur e infrastructura medico di Aruba tin y ta ofrece. Mester menciona cu OE AZV a ricibi hopi elogio ya cu e clinicanan Colombiano a keda impreciona cu loke Horacio Oduber Hospital y ImSan tin.
Encuentro fructifero
Otro experiencia hopi interesante tabata e encuentro entre e expertonan di Colombia y e specialistanan medico di Aruba. Hopi bunita tabata pa wak e interes grandi di e gran mayoria di e specialistanan medico di Aruba. E encuentronan aki a conta cu e presencia di e ramo di oncologia, cardiologia, pediatria, oftalmologia, urologia, ortopedia y e specialista di stoma, higra y tripa. Actualmente e negociacion entre OE AZV y e clinicanan ta andando den cual e ultimo revisionnan lo por wordo haci pa ambos parti, cu e meta pa firma pa fin di november. Pa OE AZV ta nifica cu entrante 1 di januari 2025 ta spera pa cuminsa traha cu e clinicanan aki.