ORANJESTAD, Aruba – 1 November 2024: AHATA Excellence Awards 2024 organisa pa Aruba Hotel & Tourism Association tabata tin e honor di presenta, Deaxo Croes, landado di distancia largo den awa habri, como Keynote Speaker di e gran evento. Conoci pa su logronan extraordinario den landamento, Deaxo a comparti su trayecto pa excelencia, captivando mas di 250 invitado cu su storia di perseverancia, resiliencia y dedicacion.
Deaxo Croes, ta e unico persona den nos historia local cu a landa di un pais pa otro den dos diferente ocasion, di Venezuela pa Aruba y di Boneiro pa Curaçao. E insights di e atleta su experiencia personal, ta algo cu a resona cu e audiencia y a conecta cu e aspiracion pa excelencia den tur ramo y profesion. Su presentacion a ilustra aspectonan clave di su trayectoria como landado, incluyendo entre otro e importancia di planifica metanan cla, e disciplina necesario den practica y preparacion, formacion di un ekipo, con pa enfrenta y supera retonan, y comparti e victoria di cada logro.
AHATA ta extende un danki na Deaxo Croes pa relata su tremendo storia cu claramente a captiva tur invitado cu inspiracion y vigor nobo pa sigui resalta y alcansa excelencia den nan bida personal y nan trabou indispensabel den turismo. Como simbolo di gratitud, Tisa LaSorte, CEO di AHATA, a regala Deaxo Croes un cuadra relevante y bunita di artista local, Armando Goedgedrag.