ORANJESTAD – Awe mainta Corte di Husticia a trata e lamentable caso di accidente na Savaneta, caminda e homber Hernandez Pinedo a fayece, despues cu Eugene Lacle (24) a dal’e cu auto net riba dia di Himno y Bandera, 18 Maart 2024.
ARUBA NATIVE por a compronde cu Eugene Lacle (24), a yora den Corte bisando cu e caso aki a dal’e duro pasobra e conoce Hernandez Pinedo for tempo nan ta chikito.
Den sala di Corte tabata presente famia di Lacle y famia di e victima. Fiscal a acusa Lacle di tabata core auto sin rijbewijs, core bao influencia di alcohol y core duro.
SOSPECHOSO A YORA Y PIDI SORRY
Ora Hues a cuminsa haci pregunta na Lacle, Lacle a lanta para y cu wowo na awa el a pidi sorry na e famia pa loke a sosode. El a bisa Hues cu e conoce Hernandez Pinedo for di chikito y cu e conoce mayoria di e famia. Lacle a bisa Hues: “E cos aki a dal mi duro”. El a ta admiti di a core duro, sin rijbewijs y bou influencia di alcohol.
Na yoramento el a bisa Hues cu tur dia cu e lanta, e ta pensa riba e accidente y esaki ta traha hopi riba dje. El a bisa cu e ta pidi Dios gui’e. El a bisa cu e tin un yiu chikito y e cos aki ta dal’e duro. E mama di Lacle tabata yora den tribuna ora cu Lacle tabata papia.
ACCIDENTE FATAL
Hues a bisa cu e ta compronde cu e caso ta duro. Hues a bisa cu Lacle a bisa cu el a bebe algun cerbez so y ora un cerbez a basha riba su paña el a dicidi di bay cas. Segun Lacle, el a haci test di supla y e test sali cu e alcohol ta halto. El a bisa cu e no tabata burachi y cu e tabata core 80 km. Na Savaneta ora el a bay pasa un truck grandi, el a hay’e cu e brommer ta bin den direccion contrario. El a purba di kita pero no por a evita e impacto. Lacle a bisa cu el a baha for di auto y e chofer di e truck a puntr’e si e ta bon. El a bay wak e victima y a mira cu ta su amigo Hernandez Pinedo el a dal y cu e victima a fayece.
Hues a bisa cu segun investigacion di Polis, Lacle tabata core entre 115 y 120 km. Lacle a bisa Hues cu ora el a bay pasa e truck el a subi velocidad. El a sigui bisa cu ora el a pasa el a mira algo ta bin y a purba kita pero tabata laat.
PUSTAMENTO?
Fiscal a mustra cu e homber W. tabata coriendo auto, a declara cu e tabata core tras di Lacle for di Mahuma y banda di rotonde Pos Chiquito hendenan sinta patras den e auto di Lacle a saca man for di bentana y tabata haci señalnan. Tambe cu Lacle lo a sende lusnan hazard. Lacle a bisa Hues cu e no a mira hende saca man for di bentana y por ta cu accidental su man a dal e boton di hazard. El a bisa cu e no conoce W. Hues a bisa cu W. a kere cu Lacle tabata kier a pusta cune. Segun Lacle, e no a pusta cu W. y tabata core 80 km.
Fiscal a pasa video di e accidente den Corte. Ta asina cu durante e investigacion, a colecta video di seguridad di diferente lugar cu a haya na Savaneta. Riba e videa, Fiscal a mustra con Lacle a pasa e truck cu velocidad halto y despues dal frontal contra e brommer. Esaki sosode 4.15 di mainta. Fiscal a mustra cu e brommer tabata core cu luz sendi. Segun Lacle, ora e tabata pasando e truck, e no a mira nada. Fiscal a remarca cu Lacle tabata core auto “right hand” y a bay pasa e truck sin cu e por wak trafico di contrario. Segun Lacle, el a kita un poco na man robez y ora el a mira cu no tin trafico, el a pasa e truck.
DEMANDA DAÑO
Abogado mr. Emerencia bisa Hues cu e mama di e victima y e pareha a haci demanda. Abogado bisa cu ayera 1 November, ta e victima su cumpleaños. Por a mira cu tanto e mama como e pareha tabata yora. E abogado a menciona 7 mil florin di daño pa e brommer. Tambe el a menciona gastonan di entiero, pero no a menciona suma. Tambe el a bisa cu daño inmaterial, e mama a keda den trauma. E mama a keda depresivo y ta bayendo psycologo. Hues a puntra e abogado riba esaki y e mama na yoramente a bisa cu cada rato e ta corda con den e impacto, e brommer di su yiu a explota. Por a ripara cu e expresionnan di e mama a pone hopi cara den sala di Corte bira tristo.
Abogado mr. Emerencia a sigui bisa cu e pareha di e defunto, e dama M.T. tabata na estado y e yiu a nace prematuro. E mester a keda hospitaliza y esaki lo por afect’e. E abogado a splica cu M.T. mester a cuminsa un caso den Corte pa reconoce Hernandez Pinedo como tata di su yiu. E abogado a bisa cu e mucha a keda sin tata y e pareha kier demanda alimentacion te ora cu e mucha tin 18 aña. E abogado a bisa cu ta calcula 86 mil florin y e demanda di daño ta 160 mil florin.
MAMA DI VICTIMA A PAPIA
E mama di e victima a papia pa e pareha M.T. y su mes. El a lesa un carta cu M.T. a skirbi. Entre otro por a scucha e mama bisa cu M.T. a skirbi: “bo a kita derecho di biba di tata di mi yiu. Mi nunca mas lo ta ok. Tin dia mi ta papia mi so pidi pa Hernandez Pinedo papia cu mi. E dolor no ta kita cu e realidad cu bo no tey mas. Ni kico wordo dicidi, nunca mi ta haya mi guy bek”. Por a mira cu Lacle tabata yora ora e mama di e victima ta papia. E mama mes a expresa na yoramento: “e accidente ta un impacto grandi pa mi”. Na yoramento el a cana bay sinti sin por a sigui expresa su mes.
FISCAL
Fiscal a bisa cu dia 18 Maart, dia di himno y bandera, famia Hernandez Pinedo a sufri impacto, ora cu e victima a fayece den accidente trafico. Fiscal a bisa cu Lacle tambe ta afecta. E lo mester biba henter su bida cu el a kita bida di un persona door di a core irresponsabel den trafico. Na opinion di Fiscal, no por papia di intencional sino cu door di su culpa a causa un accidente fatal. El a mustra cu Diadomingo 17 Maart 2024 anochi, Lacle a sali cu algun hende y a keda te den oranan di marduga bishitando diferente lugar. Bayendo cas na altura di Savaneta, Lacle a bay pasa un truck y durante cu e tabata pasa a dal den un brommer maneha pa Hernandez Pinedo. Door di e impacto uerte, e brommer a explota y Hernandez Pinedo a fayece.
Fiscal a bisa cu tabata papia cu lo tabatin un pustamento a tuma lugar. A busca diferente video di seguridad pa haci investigacion. Fiscal ta conclui cu tabatin manera un forma di pusta. Na rotonde Drive Inn por mira cu e chofer W. tabata core den banda dilanti di Lacle. Fiscal a mustra cu for di Mahuma, W. tabata core tras di Lacle. Na Drive Inn na dado momento Lacle a pasa W. y Lacle a sende e luznan hazard, cu ta mustra cu ta pidi W. pa pusta. Fiscal a bisa cu e no ta kere Lacle cu accidental su man a dal na boton di hazard. Fiscal a sigui bisa cu riba videonan por mira cu Lacle a keda core dilanti di W., kende tabata core hopi pega tras di Lacle.
INFLUENCIA DI ALCOHOL
Fiscal a mustra cu e cantidad di alcohol den rosea di Lacle tabata mas di 400 micro gram. Esaki ta hopi mas halto cu loke ta stipula pa ley. Na opinion di Fiscal, e test di rosea ta mustra cu Lacle tabata bou influencia.
CORE IRRESPONSABEL
Fiscal a mustra cu caminda cu Lacle tabata core, segun borchi mester core 60 km. Lacle a bisa cu e tabata core 80 km. Investigacion di Polis ta mustra cu Lacle tabata core entre 115 km y 120 km siendo cu ta permiti pa core 60 km. Fiscal a bisa cu e impacto tabata asina fuerte cu e wiel di brommer a keda pega den e auto.
MORTO DOOR DI CULPA
Fiscal ta haya cu tur cos ta mustra cu Lacle tabata core irresponsabel y door di su culpa a causa morto di e victima Hernandez Pinedo.
4 AÑA DI PRISON EXIGI
Fiscal a bisa cu Lacle a core sin rijbewijs, tabata core mas duro cu borchi ta mustra, a core bou influencia di alcohol. Tabata core auto “right hand” y a bay pasa un truck mientras brommer tabata bin den direccion contrario. Na opinion di Fiscal, esakinan ta motibonan di peso cu por haci e castigo subi mas. Tur esaki ta mustra cu Lacle a core irresponsabel y door di su culpa a causa morto di Hernandez Pinedo. Fiscal a exigi 4 aña di prison y kita rijbewijs pa 5 aña. Fiscal a bisa Hues cu e ta aproba e demanda di 7 mil florin pa e brommer. Tambe el a aproba un demanda di 17.557 florin. Pa loke ta e otro demandanan, Fiscal a pidi pa declara esakinan no admisibel. E ta haya cu no tin suficiente splicacion riba e sumanan aki y ta kere cu den un caso civil lo mester bay atende esakinan. Mescos e asunto di demanda di alimentacion pa e mucha. Fiscal ta haya cu den Corte Civil mester atende esaki.
ABOGADO A PONE CU A POSPONE E CASO
Mr. Kuster a bisa Hues cu for di investigacionnan por a mira cu Lacle a purba kita pa no dal contra e brommer. E abogado a bisa cu tin indicacion cu e brommer tabata core duro tambe. El a bisa cu no tabatin pustamento y e chofer W. cu tabata core tras di Lacle, a bisa cu nan no tabata pusta. Abogado a cuestiona si e test di blaas ta confiabel. El a señala cu e gas di aparato di blaas su tempo di expira a pasa. El a bisa cu por ta cu e gas ta bon pero e machine no tabata bon calibra. E abogado a pidi Hues pa tene cuenta cu tur esaki y cu e caso aki a afecta Lacle masha hopi.
E abogado ta haya cu mester declara algun di e demandanan no admisibel pasobra no tin raport di psychiater of psycologo. Esnan cu a wordo paga door di AZV no por wordo demanda. E ta comparti punto di bista di Fiscal pa declara e demandanan no admisibel.
Fiscal a reacciona cu lo ta bon pa scucha experto riba instala gas riba aparato di test rosea di hende. Hues tambe a bisa cu el a ripara e fecha cu lo a expira y ta haya cu lo ta bon pa tin claridad riba esaki. Hues a pospone tratamento di e caso pa scucha e expert. Esaki lo sosode dia 15 November 11.30 di mainta y despues lo caba cu e caso penal pa e ora ey Hues fiha un fecha pa sentencia.