ORANJESTAD – Ministerio Publico recientemente a cuminsa contra Benny Sevinger pa kita 940 florin di placanan cu ta sospecha Sevinger a haya relaciona cu caso Avestruz.
ARUBA NATIVE por a compronde cu atrobe a pospone e caso pero e biaha aki Hues a fiha 28 Februari 2025 pa tratamento di e caso.
Na Mei 2024, a cuminsa cu tratamento di e caso caminda Fiscal a bisa Hues, cu a haci un investigacion financiero caminda ta demanda 940 mil florin, cu Sevinger mester paga bek. Fiscal a bisa cu lo por cuminsa e caso pa evita cu e caso ta bira mucho bieu.
Abogado mr. Kock a bisa Hues cu e ta prefera pa warda te ora tin sentencia di Hof di Corte Superior riba e apelacion caso Avestruz. E abogado a bisa cu na Juli 2024 lo tin sentencia den caso apelacion Avestruz. El a pidi Hues pa mihor warda riba sentencia di Hof.
Fiscal a bisa Hues cu e no tin nada contra pa warda na Juli 2024 cu lo tin sentencia. Na opinion di Fiscal, e caso no tin nada di haci cu Sevinger a wordo declara liber di malversacion. El a bisa cu tin investigacion cu ta mustra placanan cu Sevinger a haya di labamento di placa den caso Avestruz. Hues a dicidi cu ta mihor pospone e caso pa 21 October 2024.
CASO LO TA FEBRUARI 2025
Den Corte ta solamente abogado mr. Kock a presenta den Corte. A papia cu ainda no tin indicacion ki dia e apelacion den Casacion lo cuminsa. Hues a bisa cu esey no lo bay stroba tratamento di e caso penal contra Benny Sevinger. El a puntra Fiscal si e ta presenta su rekisitorio. Fiscal a bisa Hues cu e ta haya cu e raport di investigacion di labamento di placa, ta hopi amplio cu Benny Sevinger a haya 940 mil florin. Fiscal ta haya cu ta abogado mr. Kock mester hiba su defensa.
Abogado mr. Kock a bisa Hues cu Fiscal ta persisti riba e calculacion pero Hues den Corte den Promer Instancia tabata pensa otro. Fiscal a remarca cu den Corte Superior a usa e mesun raport contra Benny Sevinger.
Hues a dicidi cu lo cuminsa cu tratamento di e caso caminda abogado y Fiscal lo intercambia di carta y despues lo tin tratamento di e caso. El a bisa cu pa mas tarda 2 December 2024, mr. Kock mester manda su defensa pa Fiscal y Hues. Hues a bisa cu mas tarda dia 20 Januari 2025, Fiscal mester reacciona. Hues a fiha cu dia 28 Februari 2025 lo trata e caso.