Varios scol y academia di baile a participa y comparti y gana experencia artistico di musica y baile
Desde diamars ultimo ta na Aruba e grupo Pacific Urban di Ciudad di Tumaco, Colombia pa un intercambio cultural. Varios tayer a ser organisa cu participacion di diferente scol y academia di baile aki na Aruba, incluso Filomena College Mavo na San Nicolas. Departamento di Cultura Aruba conhuntamente cu Consulado di Colombia ta invita pueblo di Aruba pa bin presencia e resultado di e intercambio cultural aki.
Esaki ta e prome biaha cu e hobennan talentoso aki ta biaha y nan a bin pa comparti tur nan talento y habilidad artistico cu bailenan moderno urbano y tambe resalta e musica, ritmo y bailenan tradicional.
E presentacion ta tuma luga mañan diabierna, 1 di november, na Scol di Arte San Nicolas cuminsando pa 6:00 pm te cu 7:30 pm. Entrada lo ta completamente gratis.
Departamento di Cultura ta gradici Consulado di Colombia y Ministerio di Cultura di Aruba y Colombia pa e exitoso trabao di cooperacion y intercambio.
