Dia 29 di october ulimo a habri na Museo Arqueologico Nacional Aruba – MANA un exposicion cu ta enfoca riba sclavitud na Aruba y papel di Hulanda colonial den sclavitud comercial.
Den e exposicion ta comparti informacion tocante e sclavitud “cora” – di Indjannan/indigenanan na Aruba. Esaki a cuminsa rond di 1515 tempo cu e colonisador Spaño a captura gran parti di e Indjannan cu tabata biba na Aruba y cu a ser hiba Hispañola como catibo pa traha den minanan.
Danki na Archivo Nacional Aruba por comparti e storia real di e catibo Thomas cu a protesta contra su trato inhusto. Ademas di obhetonan relaciona cu sclavitud na Aruba, cu cooperacion di Fundacion Museo Arubano, ta presenta e documentario Francisca & Eugenio. Un documentario impactante traha door di Rebecca Roos Productions cu ta conta e historia di shete generacion di famia Ecury. Un historia di un famia cu origen di catibo cu a bira un famia exitoso y a demonstra fortalesa pa supera y adapta na cambionan. Tin publicacionnan tocante sclavitud na Aruba cu ta ser exhibi, pa cortesia di Biblioteca Nacional Aruba. Otro publicacionnan di personanan priva por ser consulta den e skina di reflexion.
E papel di Hulanda colonial den sclavitud comercial ta ser ilustra riba 10 poster di Rijksmuseum cu storianan real di personanan cu a ser esclavisa of tabata doño di personanan esclavisa. E storianan aki ta di Caribe Hulandes, Brasil, Surinam, Sur-Africa y Asia. Rijksmuseum a enfoca pa prome biaha riba sclavitud di e periodo colonial Hulandes di siglo 17 te siglo 19. E posternan ta ilustra 250 aña di historia durante cua a considera hende un obheto cu ta propiedad di otro persona. E papel di ‘West-Indische Compagnie’ y di ‘Verenigde Oost Indische Compagnie’ den sclavitud colonial Hulandes ta ser explora.
E posternan di Rijksmuseum ta forma un exposicion viahero cu a ser presenta internacionalmente via Nacionnan Uni y UNESCO. Cu cooperacion di UNESCO Aruba y diferente aliado e exposicion ta recoriendo nos isla. A present’e comienso di e luna aki na Biblioteca Nacional San Nicolas y despues el a bay Educampus. Actualmente e ta na MANA y na november e lo sigui biaha pa Scol di Arte y Archivo Nacional Aruba. Cada anfitrion ta scohe su manera di adapta y presenta e exposicion aki door di cua e ta ‘crece’.
MANA ta gradici UNESCO Aruba y UNOCA pa a haci e exposicion aki posibel. Un danki grandi na Ministerio di Finanzas y Cultura pa sostene MANA pa e apertura di e exposicion y na nos aliadonan di e proyecto aki ANA, BNA, Scol di Arte y Educampus, y FMA pa fia algun artefactonan historico. Tambe ta gradici sra. Celia Thiel cu a contribui gratuitamente cu un publicacion y dos grabacion riba CD di canticanan riba tambu di su proyecto Patrimonio di Aruba, y sr. Nelson Thiel pa fia su calender di instrumentonan di Aruba.
E exposicion di sclavitud lo keda na MANA te dia 19 di november. Haci uzo di e oportunidad aki pa haya mas conocemento di Aruba su historia y specificamente di un tema cu apenas nos ta cuminsa explora como comunidad. MANA ta situa na Schelpstraat 42 y ta habri pa publico di 9’or di mainta te 5’or di atardi. Entrada ta a base di donacion boluntario.
