Pa medio di e comunicado di prensa aki, Organo Ehecutivo AZV ta informa tur asegurado inscribi cerca dentista Zeraida M. Romero pa tuma nota cu e contracto entre OE AZV y dentista Zeraida M. Romero ta finalisa 31 di oktober 2024.
Ta gradici dentista Romero pa su añanan di servicio cu su persona a brinda na e aseguradonan di AZV.
Traspaso automatico
Entrante 1 di november 2024 OE AZV ta percura pa un traspaso automatico pa dentista M. Rasmijn na Santa Cruz. Esaki ta sosode automaticamente (digitalmente). E asegurado mes no tin nodi haci nada. Pa wak e traspaso automatico, e asegurado ta bay den e AZV-app. Bo ta bay riba Menu →Dunadonan di cuido →E dunadonan di cuido di……→Dentista. Bou di e bloke ey lo wak e nomber di e dentista nobo.
No ta di acuerdo
Den caso cu e asegurado no ta di acuerdo cu e traspaso automatico aki, tin tur oportunidad pa inscribi cerca un otro dentista cu ta disponibel. Pa haci cambio e asegurado ta bay riba nos website www.azv.aw→Formulario→ Peticion pa cambio.
Otro opcion ta pa regla esaki directamente via e AZV-app (scoge pa Menu → E dunadonan di cuido di…→Cambia di dunado di cuido → Scoge tipo di dunado di cuido → Scoge Dentista Nobo for di e lista “dropdown” → Primi e boton “manda”).
Den caso cu bo persona a haci e cambio caba, esta cu bo a cambia caba pa un dentista di bo propio escogencia/preferencia, e ora no mester haci nada. E informacion di bo dentista lo bo wak despues den e AZV-app.
Mas pregunta?
Den caso cu despues di lesa e comunicado di prensa aki ainda tin pregunta, e ora por tuma contacto cu e departamento di Administracion di Polisa y Servicio na Cliente via Tel: 5279900 of E-mail: [email protected]