Ministerio di Labor, Energia & Integracion  Departamento di Labor y Investigacion  ta informa encuanto oranan di trabou liber pa por eherce derecho di voto riba dia di eleccion segun e Ordenansa Electoral (Kiesverordening). 

Articulo 39 Ordenansa Electoral: 

E votamento ta cuminsa 8 or di mainta y ta dura te 7 or di anochi. 

Articulo 40 Ordenansa Electoral: 

1. Tur dunado di trabou ta obliga di percura pa su trahado, cu tin derecho di voto, tin riba dia di eleccion durante e tempo stipula den articulo 39 pa vota minimo 4 ora di trabou consecutivo liber, a menos cu e trahado durante e oranan cu e eleccion ta tuma lugar ya caba tin 4 ora consecutivo liber riba un otro base. 
2. E dunado di trabou ta obliga di percura pa mas tarda un siman prome cu e dia di vota, e tempo cu e trahado ta haya e oportunidad pa vota, wordo poni na su conocemento. 

Interpretacion: 

Esencia di articulo 40 §1 di Ordenansa Electoral ta cu e dunado di trabou mester percura pa den su compania e trahadonan cu tin derecho di voto riba diabierna 06 di december proximo haya por lo menos 4 ora consecutivo liber den e periodo cu local di votamento (stemlokaal) ta habri, pues entre 8 or di mainta y 7 or di anochi. E pensamento tras di esaki ta cu tur trahado cu tin derecho di voto mester haya suficiente oportunidad pa haci uso di esaki. 

Excepcion: 

E trahado cu den e periodo cu local di votamento ta habri ya caba tin 4 ora consecutivo liber riba otro base (p.e. e trahado normalmente ta traha mita dia so of e trahado tin un shift hopi tempran of hopi laat), no por haci un apelacion serca su dunado di trabou pa e 4 oranan di trabou liber. 

Paardenbaaistraat 11 | Oranjestad, Aruba | Tel.: (297) 5237720 | Fax: (297) 5237772 | [email protected] 

Directie 

Arbeid & Onderzoek. 

Ehempelnan: 

E votado cu ta traha di 7:30 or te 12 or di merdia y di 1 or te 4:30 or di atardi lo mester haya liber di 7:30 or te 11:30 or di merdia of di 12:30 or te 4:30 or di atardi. 

⚫ E votado cu ta traha ‘part–time‘ di 8 or te 12 or di merdia no por haci 

apelacion riba e 4 oranan di trabou liber. 

E votado cu ta traha shift di 7 or di mainta te 3 or di merdia tampoco por haci apelacion riba e 4 oranan di trabou liber. Esaki ta conta tambe pa e votado cu ta traha un shift di 12 or di merdia pa 8 or di anochi of un shift di 3 or di merdia pa 11 or di anochi. 

Adicional na e obligacion di e dunado di trabou pa permiti su trahadonan cu tin derecho di voto e tempo liber pa nan eherce nan derecho di vota, articulo 628 §4 y §5 Codigo Civil di Aruba ta stipula cu e trahado ta mantene su derecho riba salario pa e oranan liber cu e ta haya pa eherce e derecho aki. 

Departamento di Labor y Investigacion ta pidi tur trahado y principalmente dunadonan di trabou pa tene bon cuenta cu e informacion aki.