Riba di peticion di Fundacion Parke Boy Ecury conhuntamente cu Departamento di Cultura Aruba, Biblioteca Nacional, Museo Arqueologico, Archivo Nacional, Gobierno di Aruba a declara dia 6 di november como un dia anual pa Conmemoracion di Luchadornan pa Libertad.
Boy Ecury ta simbolisa tur heroe Arubiano cu a bringa pa libertad durante segunda Guera Mundial.
Comision Celebracion Dianan Nacional y Fundacion Parke Ecury a traha riba un programa nacional, cu ta dirigi tambe riba e hubentud pa medio di ‘lesbrieven’ cu a bay pa tur school. Sra. Olga Buckley a traha riba e ‘lesbrief’ pa school primario y Meneer Adonsito Croes a traha esun pa school avansa. E expresionnan creativo di e hobennan di school avansa lo forma parti di e exposicion di Arubiana, un departamento di Biblioteca Nacional. E expo ta habri dia 30 di october pa 6or di atardi cu un programa cu discurso, presentacion di musica, declamacion y teatro (monologo) di studiantenan di Hulanda. Unda entre otro e ganador di Arte di Palabra di añanan anterior, Osvaldo Correa lo presenta. Un y tur ta keda invita pa no perde e apertura di e exposicion aki cu ta di hoben pa hoben. E exposicion lo ta habri pa publico pa un luna durante dia y tur hende ta bon bini pa bin experencia algo di nos historia. Nos ta warda boso dia 30 di october desde 6 or di atardi.