Oranjestad- Aruba Airport Authority N.V. ta contento pa anuncia cu Queen Beatrix International Airport (AUA Airport) ta oficialmente un miembro di “Hidden Disabilities Sunflower Network”. Esaki ta parti di e esfuersonan di aeropuerto pa crea un ambiente inclusivo y di apoyo pa e empleadonan, e pasaheronan y demas usuarionan.
Actualmente, un di cada seis di e poblacion mundial ta biba cu algun tipo di discapacidad, loke ta ekivalente na aproximadamente 1.3 biyon di hende. Mientras cu algun discapacidad ta visibel, hopi otro ta scondi of un combinacion di tur dos. E condicionnan aki por ta temporal, ocupacional, situacional of permanente y ta inclui condicionnan neurologico, cognitivo y di neurodesaroyo, entre otro. E red global di “Hidden Disabilities Sunflower” ta permiti e personal di aeropuerto pa reconoce e individuonan cu ta bisti “lanyard” oficial di “sunflower” y puntra con nan por sostene nan y pa asina nan por cumpli cu nan necesidadnan di acceso, haciendo loke ta invisibel bira visibel.
Riba diabierna dia 25 di october 2024, a lansa oficialmente e “Hidden Disabilities Sunflower Program” cu un ceremonia chikito na AUA Airport durante Siman Internacional pa Conscientisacion di Discapacidad Invisibel (International Invisible Disability Awareness Week) den presencia di Maureen de Mooy-Schreuder, Embahador di Hulanda y Belgica pa Hidden Disabilities Sunflower team, Carolina Thiel-Span, Presidente di Fundacion Autismo Aruba (FAA) y defensor di “Sunflower”, Sary Wernet-Kelly, Revalidation Therapist na Fundacion Arubano di esnan Visualmente Incapacita (FAVI), Team di Salud y Sostenibilidad di AAA, demas colega y comunidad di aeropuerto. E ceremonia a inclui un discurso den nomber di e team di “Hidden Disabilities Sunflower Program”, FAA y AAA, a conclui cu ponemento di e prome sticker oficial di “Hidden Disabilities Sunflower” na e punto di control di siguridad door di Byron Lesire y Kay Quandus, ambos ta embahador pa Fundacion Autismo Aruba. Pa resalta e ocasion special aki, tanto e empleadonan como e pasaheronan a haya un cuki cu e tema di “sunflower” como parti di e lansamento oficial.
Prome cu e lansamento, durante luna di september y october 2024, aproximadamente 200 empleado incluyendo personal di siguridad di aeropuerto, concessionaires, agentenan di servicio na cliente y demas persona envolvi den e operacion di aeropuerto, a ricibi un training di conscientisacion pa nan familiarisa nan mes cu e programa Hidden Disabilities Sunflower. A informa e miembronan di personal con pa yuda cu respet y eficiencia, garantisando cu cada bishitante ta sinti nan mes sosteni y balora.
“Nos ta reconoce y lo sigui defende e importancia di inclusion y diversidad na nos aeropuerto. Nos ta super orguyoso di anuncia nos miembresia di e “Hidden Disabilities Sunflower” y ta boga pa crea un luga di trabou sigur y acogedor pa tur nos empleadonan, pasaheronan y comunidad di aeropuerto. Door di adopta e “Hidden Disabilities Sunflower”, nos ta demostrando nos sosten na e individuonan cu discapacidad invisibel”, asina Angeline Flemming, Director Health and Sustainability, a expresa.
Paul White, CEO di Hidden Disabilities Sunflower, a enfatisa cu: “Nos ta encanta di por yama bonbini na Aeropuerto di Aruba na e red global di “Hidden Disabilities Sunflower”. E “sunflower” ta un herment di comunicacion efectivo pa e pasaheronan duna señal na e personal di aeropuerto cu nan lo mester ofrece ayudo, comprension y bondad. E ta haci un diferencia positivo pa e experiencia di biahe pa e personanan cu tin discapacidad invisibel”.
Pa mas informacion tocante Hidden Disabilities Sunflower bishita nan website: hdsunflower.com
Tocante AUA Airport Tocante AUA Airport AUA Airport ta un di e aeropuertonan mas ocupa den region Caribe, cu mas di 25 diferente aerolinea operando na Aruba contribuyendo na casi 3 miyon pasahero pa aña y brindando
servicio aereo na 31 pais y 45 destinacion non-stop rond mundo. Di e mercadonan cu AUA Airport ta brinda servicio na dje, 77% ta di Merca y Canada, 15% ta di Latino America, 4% ta di Europa y 4% ta di Caribe Hulandes. AUA Airport ta reconoce cu esaki ta danki na un economia stabiel, clima politico, hospitalidad, populacion diversifica y siguridad general di nos isla. AUA Airport su aspiracion ta pa converti den un di e aeropuertonan mas sostenibel, sigur y prepara pa futuro den e region di Latino America y Caribe, brindando un espacio laboral confiabel, cu e instalacionnan moderno y ademas cu un excelente servicio n’e cliente p’asina por refleha e hospitalidad di Aruba, contribuyendo na un futuro prospero pa Aruba.
Haya sa mas di loke ta pasando na AUA Airport door di bishita www.airportaruba.com y conecta cu AUA Airport riba Twitter.com/Aruba_Airport, Facebook.com/ArubaAirport, Instagram.com/arubaairport, TikTok.com/@arubaairport y Linkedin.com/ArubaAirport.
