ORANJESTAD – For di 1 januari 2021, e ley di Regulacion di Finansas di Partido Politico (AB2020 no. 153) ta na vigor na Aruba.
E meta di e ley aki ta pa controla e finansas di e partidonan politico y candidatonan cu ta participa den e eleccion parlamentario. E Comision di Finansas di Partido Politico (Comision di Finansas), di cual e presidente di Conseho Electoral ta fungi como presidente, ta encarga cu e supervision di e finansas di tur partido politico y candidato. Recientemente, a instala e Comision di Finansas y pa prome biaha e comision den henter su constelacion lo supervisa e finansas di tur partido y candidato durante henter e proceso di eleccion. Siguientemente e Comision di Finansas kier a vocifera e reglanan cu ta conta pa tur partido politico y candidato y cu lo aplica esaki segun ley durante e participacion den e eleccion parlamentario di dia 6 di december 2024.
Rekisitonan Principal
- Registro di Donacion:
Tur partido y candidato mester registra e donacionnan cu a ricibi for di 12 luna prome cu eleccion. - Entrega di Registro:
E registro di donacionnan te 21 dia prome di eleccion mester wordo entrega na e Comision di Finansa. Entrega di esaki mester tuma luga entre 21 pa 14 dia prome cu e eleccion venidero. - Declaracion di Entrada y Gasto:
Tambe nan mester presenta un resumen di e entrada y gasto di nan actividadnan di recaudacion di fondo.
Si nan no cumpli cu e rekisitonan aki, e Comision di Finansas por solicita informacion adicional y tambe por impone multa.
Publicacion di Donacion:
- 7 dia prome cu eleccion, e Comision di Finansas lo publica un resumen di e donacionnan ricibi door di e partidonan politico y candidatonan.
- Despues di eleccion, e partidonan politico y candidatonan mester entrega otro resumen dentro di 7 dia despues di eleccion y e Comision di Finansas lo publica un rapport 14 dia despues di e eleccion.
Ta fundamental cu tur e partidonan politico y candidatonan cu ta participa den e eleccion dia 6 di december 2024 ta na altura di nan obligacionnan y cu nan lo cumpli cu e obligacionnan aki pa garantisa e transparencia financiero.