Boneiro – Ciclistanan di Aruba a demonstra nan forsa durante e careda di mountain bike Duo Xtreme Bonaire 2024. E evento, cu a tuma luga riba 20 di october ultimo, a conta cu 80 participante di Boneiro, Corsou, Hulanda y Aruba. Ciclistanan por a scoge entre un ruta di 55km of uno di 76km, cu ambos ta pasa door di e bunita naturalesa di Boneiro.
E grupo di ciclista di Aruba a gana premio den varios categoria, asina demonstrando e nivel di coredornan di mountain bike na Aruba. Por a conta cu participacion di Paul Cremers, Sabine Zijlstra, JP van den Eerenbeemt, Edwin Hekman, Victor Vrolijk y Rebecca Jansen. Tambe Bert Schreuders tabata presente di parti di C3 – Critical Communications Caribbean, pa maneha e sistema di timing pa e careda.
Pa resultado di e careda, por bishita e pagina di Facebook di Bonaire Xtreme MTB of https://timing.events/Event/Results?id=87
Bonaire Bicycle Club, e grupo cu a organisa e edicion 2024 di Duo Xtreme Bonaire, ta gradici tur participante, especialmente esnan cu a biaha bin Boneiro. Tambe kier duna danki na tur boluntario y patrocinadornan di Duo Xtreme Bonaire 2024: Karel’s Beach Bar, Sunbelt Realty, De Freewieler, Pink Coral iT, Mega Hit FM, The Wine Factory, Powerade, Bonaire Logistics and Wholesaler, Olovka, C3 – Critical Communication Caribbean, FX Sports Bonaire, Wire Interiors Bonaire, GenKoo Generatoren, Allways Transport, Building Depot, Rocargo Services, Latino Ice y Chogogo Dive & Beach Resort.
