ORANJESTAD – E bishita oficial di trabou di presidente di Republica Surnam, S.E. Chandrikapersad Santokhi, na Aruba a finalisa exitosamente. Durante di e bishita oficial di un dia tur dos pais a sigui pone pasonan pa fortifica nan lasonan bilateral.
Un punto culminante importante di e bishita tabata e firmamento di un Memorandum of Understanding (MOU) entre Prome Minister di Aruba y e Minister di relacion y commercio exterior (BIBIS) di Surinam. E MOU aki ta promove cooperacion den areanan di: Economia y Comercio, Responsabilidad Social Corporativo y Produccion Limpi, Cadenanan di Logistica y Transporte, Agricultura, Medio Ambiente, Turismo, Enseñansa, Cultura y Cuido di Salud. Tambe a pone atencion na cooperacion di Migracion, Aduana y esfuersonan conhunto den combatimento di Criminalidad organisa, Terorismo y Traficacion ilegal di droga
E encuentro ta marca un paso importante pa fortifica mas ainda e relacion amistoso y diplomatico entre Aruba y Surnam, cu iniciativanan y proyectonan conhunto cu ta contribui na crecemento economico y desaroyo sostenibel pa ambos pais.
Delegacion di Surnam a sali awe mainta cu perspectivanan positivo pa mas cooperacion y exitonan comparti den futuro.
Departamento di Relacion Exterior ta agradece tur persona y instancianan gubernamental y den sector priva cu a brinda cooperacion y bon servicio cu a haci e bishita oficial di President di Surinam y su delegacion uno exitoso.