ORANJESTAD, ARUBA – Den e siman cu a pasa, Aruba Conservation Foundation (ACF), como un organisacion di maneho di conservacion independiente, a organisa dos dia di tayer pa asina yega na obhetivonan defini pa garantisa cu areanan natural protegi di Aruba lo florece a base di plan di maneho di conservacion conciso y efectivo. Atendi pa mas di 30 diferente stakeholders di diferente sector, e tayernan akinan a wordo realisa cu ayudo financiero di Dutch Caribbean Nature Alliance (DCNA).
Pa dos dia intenso, representantenan di diferente gremio, departamento publico y organisacionnan no-gubernamental a reuni riba con pa yuda fiha maneho riba areanan natural y protegi cu ta cay bou responsabilidad di ACF. E meta tabata pa establece un vision comparti pa e futuro di e areanan costal y terestre di Aruba, identifica temanan principal di conservacion y obhetivonan pa proteha biodiversidad y salud di nos ecosistema, colabora cu otro pa crea plan di maneho integra pa uso sostenibel di tera y areanan di costa. Finalmente, a identifica accionnan cu mester keda implementa den cinco aña pa conserva e areanan aki, cu ta inclui e areanan di duinen, saliña, rooinan, mondinan di mangel y e islanan di rif.
Director di Conservacion di ACF Natasha Silva, den presencia di Minister di Naturalesa Ursell Arends a habri e tayernan pa gradici e participantenan pa accepta e invitacion pa yuda traha maneho pa areanan terestre y costal. Silva a splica cu ya caba a haci un ehercisio similar pa e 4 areanan marino protegi cu ta cay bou encargo di ACF, caminda cu ta yegando na un plan di maneho.
E tayernan tabata bou guia di expertonan Dr. Lawrence Jones-Walters di Natural Dialogue y Bernie Fleming di Fleming Ecology. Dr. Jones-Walters ademas di ta un di e facilitadornan mas renombra riba dialogo ecologico ta na cabez di e Programa di Medioambiente Biodiverso di Universidad di Wageningen, y su enfoke ta contribui na logra obhetivonan di sostenibilidad ambiental. Fleming di otro banda tin decadanan ta duna consehonan pragmatico riba biodiversidad y maneho ecologico rond Europa y na Reino Uni. Banda di facilita strategianan di conservacion, entre otro Fleming a contribui na varios pubicacion entre otro uno di Ministerio Hulandes pa Evaluacion Ambiental riba perspectiva di naturalesa den Europa.
Jones-Walters y Fleming hunto tin mas di 70 aña di experiencia internacional den area di maneho ecologico, y nan a usa e strategia pa un grupo diverso di persona delibera cu otro pa bin cu nan vision con Aruba mester ta na 2050. Tur dos dia a parti gruponan den cinco, unda cada uno a presenta nan vision. A base di votacion a scohe e proposicionnan cu mas ta yega serca di un obhetivo, unda un biaha mas tur grupo a trece sugerencia con pa mehora e vision y accionnan necesario.
Algo cu a resalta cu apesar di a tuma diferente aspecto di maneho di areanan terestre y costal, puntonan comun tabata implementacion di ley, consientisacion y monitoreo, basa riba data.
Tur grupo a enfatisa cu pa logra obhetivonan cu a bin dilanti, mester di participacion y compromiso di henter comunidad, ya cu hende tambe ta parti di naturalesa. Pa mehora calidad di bida na Aruba mester proteha e biodiversidad y ecologia di e isla.
Na fin di e tayernan Director di Conservacion a enfatisa e balor di e contribucion di tur participante. E obhetivonan principal, esta e vision y accionnan corespondiente ta cuadra cu locual ACF mes a formula pa su mes. “No solamente nos ta ripara cu locual nos mes tambe a pensa, ta locual ta biba memey di stakeholders, sino cu e tayernan a produci mas informacion practico pa e plannan di maneho.”
Director General di ACF, Tyson Lopez a mustra cu e plannan di maneho ta parti di ACF su ‘Conservation Framework and Priorities 2024 – 2033’ pa eleva e calidad di areanan natural cu ta bou encargo di e fundacion, cu tin efecto positivo pa henter e isla. Ta a base di e strategianan aki lo traha riba e base financiero, capacidad humano, programa di educacion y colaboracion cu mester pa realisa e obhetivonan.
E expertonan Jones-Walters y Fleming awor ta encarga pa scirbi e proposicionnan di maneho basa riba locual e stakeholders a presenta. Despues di consulta cu entre otro Gobierno, ACF ta spera di por cuminza implementa e plannan di maneho, tanto pa e areanan marino, terestre y costal pa cuminsamento di 2025.
Pa conoce mas di Aruba Conservation Foundation, for bishita www.acf.aw of bishita e paginan social di Facebook, Instagram, of LinkedIn. Pa conecta cu e team por manda email na [email protected].
