Ta prolonga e supervision financiero pa Corsou y Sint Maarten, manera regla den e Ley di Reino supervision Corsou y Sint Maarten (Rft). Riba 4 di october Conseho di Minister di Reino a dicidi esaki basa riba conseho di e comision di evaluacion di Rft 2024 pa e periodo 2021- 2023. Tocante esaki, awe Secretario di Estado Szabó ta manda un carta y e rapport di e comision di evaluacion pa Eerste y Tweede Kamer.
E comision di evaluacion, cu ta consisti di expertonan independiente di Corsou, Sint Maarten y Hulanda, ta conclui den su rapport cu e dos paisnan ainda no ta cumpli na un manera structural cu e normanan presupuestario di Rft. E comision ta bisa cu e pandemia di covid a contribui na un manera significante na esaki. Apesar cu economia a recupera despues di e pandemia di covid, e comision ta ta di opinion cu terminacion di e supervision na e momentonan aki no ta posibel. E supervision pues ta keda na vigor. Un siguiente evaluacion ta tuma luga pa mas tarda den 2027.
E comision ta haci tres recomendacion importante: desaroyá un cuadro di evaluacion, haci mihor uzo di e posibilidadnan huridico den e Rft y garantisa institutonan independiente. E comision di evaluacion ta bisa por ehemplo cu Colegio supervision financiero (Cft) y e paisnan mester desaroya un cuadro conhuntamente cu cua por determina obhetivamente si ta cumpli cu e normanan presupuestario. Ademas, e comision ta mustra riba e posibilidad cu e paisnan tin pa por haci inversionnan strategico denter di e normanan di Rft. Finalmente e comision ta boga pa sigui fortifica e base di finansa publico pa medio di institucion di institucionnan fuerte y independiente.
Secretario di Estado Szabó: “E meta di e ley ta y lo keda, finansa publico sostenibel y bon maneho financiero. Esaki ta un condicion esencial importante pa e paisnan por yuda nan mes. Gustosamente mi kier sigui traha conhuntamente cu e paisnan riba e trayecto importante aki.”
E paisnan Corsou y Sint Maarten a indica cu nan ta desea un perspectiva riba un futuro sin supervision. Conseho di Minister di Reino pa e motibo ey a invita ambos pais pa sigui traha conhuntamente cu Cft y Hulanda, riba finansa publico sostenibel y bon maneho financiero.
Conseho di Minister di Reino ta eherce e supervishon, den cua Cft tin un papel di señala y conseha. Rft a drenta na vigor na 2010 pa un periodo di cinco aña. Por prolonga e supervision cada biaha cu 3 aña, despues di evaluacion.