Promoviendo innovacion, expresion cultural y desaroyo sostenibel den e sectornan cultural y creativo di Aruba
Siman pasa a tuma luga e prome Creactivo Conference. Departamento di Cultura (DCA) ta honra di por tabata un partner di “Creactivo Conference”, un evento innovador cu ta alinea cu nos compromiso estrategico pa avansa e industrianan creativo, conforme cu e Maneho di Industrianan Creativo. Gobierno di su banda pa basta aña caba a incorpora Industrianan Creativo como parti di su maneho. Industrianan Creativo ta un di e sectornan cu a wordo identifica como uno prometedor y cu tin potencial pa contribui na desaroyo sostenibel di e economia di Aruba.
Ta un responsabilidad en conhunto di sector publico y sector priva pa sostene y promove nos industrianan creativo. E partnership di Departamento di Cultura Aruba y Fundacion Go Cultura pa e prome Creactivo Conference, ta refleha e dedicacion di DCA pa sigui promove innovacion, expresion cultural y desaroyo sostenibel den e sectornan cultural y creativo di Aruba.
E “Creactivo Conference” tabata dos dia di inspiracion, innovacion y conexion, na unda a uni e mentenan mas briyante den e mundo creativo global. Sosteniendo e evento aki, DCA un biaha mas ta enfatisa e importancia di creatividad como un motor pa preservacion cultural, cohesion social, y desaroyo economico. E colaboracion cu Creativo Conference ta subraya e rol di e departamento como un catalisador pa progreso, aparte di e sosten cu DCA ta duna na diferente NGO’s, pa sigui apoya nos talento local y asina pone Aruba den un posicion como un hub creativo den e industrianan di cultura den nos region.
Departamento di Cultura, ta expresa su sincero danki y un caluroso pabien na Fundacion Go Cultura pa nan iniciativa, como tambe na tur colaborador y patrosinador, danki na un y tur pa haci e prome Creactivo Conference un exito grandi. E participacion di nos talentonan local, intercambiando idea y experencia cu profesionalnan di exterior, ta crea e posibilidad pa conexion duradero y asina ta contribui mas na e futuro di nos sector cultural di Aruba.