Caya Corsou, San Nicolaas: Diamars den careda di 5’or di marduga, presencia di brandweer a wordo pidi cu urgencia pa un candela hopi grandi den un cas bandona den caya Corsou, den e cas bandona aki un cantidad di sushi tabata wordo deposita y pa un of otro motibo esaki a pega candela y a kima e cas tambe.
Hopi lihe brandweer a yega na e sitio y a combati e candela grandi aki. E cas inhabita aki ta pertenece na un comerciante chines, varios persona te hasta di pafo di Village tabata bin tira nan sushinan den e cas aki.
Algun siman pasa e doño lo a ricibi bishita di City Inspector y nan lo a pidi’e pa porfabor haci e cas aki limpi, no lage yen di sushi asina. E doño no a logra haci’e limpi y e candela di awemarduga mes a kima e cero di sushi den e cas.
