ORANJESTAD – Dialuna 14 di october, Prome Minister Evelyn Wever-Croes den compania di Minister di Enseñansa y Deporte, señor Endy Croes tawata presente pa e ocasion di celebracion di 65 aña di Colegio Arubano. Prome Minister, durante su discurso, e mandatario a comparti parti di su experiencia tempo cu el a bishita e scol y a splica riba e importancia cu Colegio Arubano tin den e comunidad di Aruba.
Discurso Prome Minister:
“Ta un honor y orguyo pa ta presente como Prome Minister di Aruba na e ocasion special aki celebrando e 65 aña di Colegio Arubano; un institucion cu tin un luga importante den e curason di nos comunidad y di tur cu a haya e oportunidad di bishita e scol aki. Un scol cu no solamente a forma e base academico di hopi Arubiano, pero tambe a guia nos pa bira e persona cu nos ta awe y ken nos lo kier ta den futuro.
Pa mi mes, ta cu gran orguyo mi por bisa cu mi a pasa un temporada di bida inolvidabel na e scol aki. Si mi por bisa un cos di mi tempo na Colegio Arubano ta cu e no tabata solamente un luga di siña vaknan fundamental manera wiskunde y nederlands, pero tabata unda varios di nos a siña habilidadnan manera cooperacion y comunicacion cu sigur a hunga un rol fundamental den nos preparacion pa estudionan den exterior.
Awe Colegio Arubano ta forma un parti fuerte den e sistema di educacion riba nos isla. E scol aki no solamente a crece, pero tambe a adapta na tempo moderno cu tecnologia y innovacion, pero semper manteniendo e balornan fundamental di formacion di nos pais. Mi kier uza e momento aki pa honra no solamente alumno- y ex-alumnonan, pero tambe maestro- y ex-maestronan, pa nan dedicacion y pasion pa e trabou den formacion di futuro generacionnan cu ta testimonio di e exito di Colegio Arubano pa e ultimo 65 añanan.
Como ex-alumno di Colegio Arubano, e recuerdonan di sinta cu amiga y amigonan den pauze, of e pasion cu Meneer Capelo tabatin pa carnaval y actividadnan escolar ta e recuerdonan cu ta yena mi cu orguyo di por a bishita Colegio Arubano. Un scol cu a forma e persona cu mi ta awe y unda mi a conoce amistadnan pa resto di bida.
Riba un dia manera awe mi kier pa nos reflecciona riba e caminda cu nos a cana pa yega na e momento aki y tambe riba e retonan cu nos por enfrenta riba e caminda pa e futuro cu nos kier crea. E tempo cu alumnonan ta pasa na Colegio Arubano ta un tempo cortico, pero e lesnan di bida cu nan ta siña lo tey cu nan pa semper. Pabien na henter e directiva di Colegio Arubano, rector- y ex-rectornan, na maestro- y ex-maestronan, alumno- y ex-alumnonan. Y cu e siguiente 65 añanan por trece mas conocemento y crecemento pa nos isla Aruba.
Masha danki!”