Despues di anuncia riba 29 di september un “Open Call”, Minister Geoffrey Wever ta anuncia cu un total di 23 empresario (aspirante) a demostra interes den produccion comercial di webo di galiña na Aruba. Registracionnan ricibi a duna informacion valioso di nos comerciantenan pa asina hunto pusha pa logra e meta di subi produccion comercial.
E ‘open call’ aki ta parti di e maneho economico cu a keda aproba pa Conseho di Minister dia 16 di Augustus ultimo. Segun informacion di Departamento di Asuntonan Economico, den 2023 un total di 738 mil webo di galiña a wordo produci pa comerciantenan local, cu ta representa 15% di e total consumo di webo na Aruba. E meta di e maneho di Ministerio di Asuntonan Economico ta pa redobla e cifranan di aña pasa y yega na 1.4 miyon di unidad pa aña 2026 mirando e potencial pa e industria aki crece.
E informacion ricibi di comerciantenan ta varia di entre otro pidi un permiso di negoshi te e necesidad di mas tereno pa por subi produccion comercial di webo di galiña na Aruba.
Dialogo y colaboracion continuo cu comerciantenan ta necesario pa tin mas actividad economico. E resultado di e “open call” ta demostra cu nos comerciantenan tin e ambicion pa produccion local di webo di galiña yega 100 porciento”, minister Geoffrey Wever a expresa.
E siguiente paso ta hunto cu e departamento concerni, resolve e diferente retonan cu comerciantenan a indica manera entre otro ampliacion di tereno. Cada comerciante lo ricibi un invitacion di Ministerio di Asuntonan Economico pa un sesion informativo cu e departamentonan DEZHI, Santa Rosa y DIP pa hunto pusha e industria di webo como pilar economico.
Minister Geoffrey Wever ta gradici tur comerciantenan cu a participa na e “Open Call” pa stimula e industria di webo. “Ta importante e dialogo continuo cu comerciantenan pa hunto pusha e produccion di webo y no depende mas di importacion. E interes demostra ta subraya mas ainda nos compromiso pa duna e sosten y guia necesario pa logra nos ambicion cu como pais nos mes ta produci 100 porciento webo di galiña”, segun minister Geoffrey Wever.