ORANJESTAD – Departamento di Asuntonan Economico, Comercio y Industria y su unidad Exprodesk, segun maneho economico di Ministerio di Economia, Comunicacion y Desaroyo Sostenibel, ta organisa den colaboracion cu e ‘Trade Agreements Branch; Textile & Trade Agreements Division di U.S. Customs and Border Protection (CBP)’, dos dia di tayer cu lo tuma luga dia 12 y 13 di november 2024.
E tayernan aki tin como meta pa fortalece e posicion di Aruba como un benefisiario bou di Caribbean Basin Economic Recovery Act (CBERA) y pa logra e status di beneficiario di Caribbean Basin Trade Partnership Act (CBTPA). Expertonan di e ‘Trade Agreements Branch; Textile & Trade Agreements Division di U.S. Customs and Border Protection’ ta bay pone nan experencia na Aruba su disposicion pa asina yuda Aruba beneficia completamente di e bentahanan di e acuerdo comercial aki.
E dos dia di tayernan aki lo beneficia Douane di Aruba, DEZHI su unidad Exprodesk, Free Zone Aruba (FZA), Aruba Trade & Industry Association (ATIA), y Camara di Comercio y Industria di Aruba (KvK). Tambe lo tin invitadonan special pa atende e tayernan aki manera Ministerio di Desaroyo Economico di Curaҫao (MEO), Douane di Curaҫao, Camara di Comercio y Industria di Curaҫao y otro institucionnan relevante.
E tayernan aki lo asisiti e departamentonan di gobierno y institucionnan di Aruba y Curaҫao, pa brinda un miho apoyo na e sector di exportacion y maximalisa e beneficionan di e CBERA y e CBTPA y asina aumenta e contribucion na e economia di Aruba y e area di Caribe. Pa mas informacion over di e dos dia di tayer aki, por tuma contacto cu sra. Sharon Meijer via: [email protected]